Manai viehkat ovdalgaskabeaivvi, muhto ii boahtán šat ruoktot.
50-jahkásaš dievdu manai viehkantuvrii sotnabeaivve ovdalgaskabeaivve. Go ii dihtton šat, dieđihuvvui son láhppon. Rukses Ruossa, Sea King, báikkálaš politiijat ja siviilasuodjalus oktan Iŋggášguolbana soalddáhiiguin ohcagohte dievddu.
Politiijaid operašuvdnahoavda Finnmárkku politiijaguovllus, Lars Rune Hagen, dieđiha ikte eahket iFinnmárkui dii. 21:20 ahte dievdu lea jápmán.
– Mii leat gávdnan albmá, muhto son ii leat eallime šat, dadjá Hagen.
Manne lea jápmán eai sáhte politiijat vel duođaštit.
iFinnmark čálii dán ovddemus.
Eai várot láhkarihkkuma áššis
Lars Rune Hagen muitala Nordlys aviisii ahte dievdu gávdnui bálgáalde E6 luotta guoras, davábeal Skuvvanvári, Porsáŋggu gielddas.
– Eaktodáhtolaččat geat ledje ohcame albmá gávdne su. Mii leat leamaš báikkis fárrolaga oapmahaččaiguin, dajai Hagen Nordlysii sotnabeaieahket.
Son deattuha ahte eai várot láhkarihkkuma áššis.
– Doaktárat fertejit gávdnat siva manne lea jápmán, dadjá Hagen Nordlysii.
