May-Lise Triumf lea evttohan ahte juovlafuomášupmi galggašii Ida Halvorsenii ja su bearrašii.
May-Lise Triumf akkastallá dainna ahte Ida ja su bearaš ánssášit fuomášumi dan dihte go áigot lágidit ja doallat juovlaávvudeami Guovdageainnu ássiide.
Ávvir lea ovdal čállán dan birra go Ida ja su bearaš áigot lágidit juovlaávvudeami ássiide suohkanis, geat iešguđetge ákkaid dihte eai sáhte dahje háliit ávvudit ruovttuin.
Sáhttá leat heajos ruhtadilli, muhto sáhttá maid ahte mánát leat fárren ruovttuin, olmmoš dovdá iežas okto, dahje jo dušše háliida earáládje ávvudit juovllaid dán jagi.
Eaba daga fuomášumi ovddas
Ida ja su ovttasássi Nils Andreas Tornensis leaba Rema 1000:s Guovdageainnus, go Ávvir fitná geigeme juovlafuomášumi sudnuide.
Soai hirpmástuvvaba go oaidniba maid leaba ožžon ja gullaba manne leaba ožžon juovlafuomášumi.
– Moai ean daga dán fuomášumi ovddas, moai barge dán dan dihte go munnos lea dat vejolašvuohta, muitala Nils Andreas.
– Muhto lea hui somá oažžut dákkár fuomášumi, dadjá Ida.
Ida ja Nils Andreas leaba geargan juovlaávvudeamiráhkkanemiiguin, ja vuordiba dušše diehtit gallis leat dieđihan ahte bohtet.
– De moai dihte dárbbašetne go viežžat eambbo vehkiid, muitala Ida.
Juovlamánu geiget mii Ávviris juovlafuomášumi olbmuide geat ánssášit liigefuomášumi barggu ovddas maid dahket illun earáide. Cavgil midjiide gii ánssášivččii juovlafuomášumi. Čális e-poastta post@avvir.no. Čális oanehaččat manne juste dat olmmoš ánssášivččii juovlafuomášumi.
