Diimmá rájes leamaš unnimus olmmošlogu lassáneapmi 2004 rájes.
Diibmá lassánii Norgga olmmošlohku birrasii 32 000 olbmuin, ja dat mearkkaša ahte riikkas ásse 5 328 000 olbmo go 2019 rahpasii.
Dá lea unnimus lassáneapmi 2004 rájes.
Obbalaččat lea Norgga olmmošlogu lassáneapmi njiedjan 2012 rájes.
Eanemus lassáneapmi
Akershusas ja Oslos lassánedje ássit eanemusat 2018:s, badjel bealli olles diimmá olmmošlogu lassáneamis dáhpáhuvai dán guovtti fylkkas.
Sogn ja Fjordanes, Opplánddas, Finnmárkkus ja Telemárkkus njiejai olmmošlohku.
Ná máŋgga fylkkas ii leat njiedjan olmmošlohku 2005 rájes, čájehit Statistihkalaš guovddášdoaimmahaga logut.
Boarásmuvvat
Agi ektui ges čájehuvvo ahte Norgga álbmogis lassánit vuorraset olbmot.
Ođđajagemánu 1. beaivvi 2019:s lei álbmoga gaskamearálaš ahki 40,28 jagi.
Lagabui 17 000 olgoriikalačča fárrejedje Norgii diibmá.
Dát lea sullii bealli olmmošlogu lassáneamis.
Eanemus olbmot bohte Polenis. Dál ásset Norggas 105 000 polskalačča.
Oktiibuot orrot 584 000 olgoriikka stáhtaborgára Norggas.
