Báikkálaš kulturlágideamit leat dehálaččat olbmo loaktimii ja ovdánahttimii. Kulturlágideamit nannejit sihke eaktodáhtolaš bargguid, ovdánahttet min kulturaktevrraid sihke musihkka-, dáidda- ja falástallansuorggis ja addet ássiide buriid vásáhusaid.
Duvle lea Guovdageainnu suohkana ovdagoddi addán ruđalaš doarjaga dáidda doaimmaide:
• Dáiddadállu: ovdánahttinprošektii mii galgá geahčadit mot Dáiddadállu nanne iežaset doaimma vai šaddá gievrras ja nanu kulturásahus ja kulturguoddi Guovdageainnu suohkanis.
• Davvi Division: lágidit juovlakonsearttaid.
• Máze giehtadáidui: ovdaprošeakta prošekteret dáiddadálu Mázii.
• Guovdageainnu Johttisámesearvái: lágidit boazodoallofestivála.
• Miron Gilisearvi: lágidit biebmo- ja kulturfestivála gos váldofokus lea biebmu ja árbevirolaš luohti.
• Sokki Adventure: lágidit doaimmaid mánáide beassážiid.
• Guovdageainnu falástallansearvi: hukset čuovggaid birra spábbačiekčanarena vai lea vejolaš lágidit čiekčamiid čakčat go lea sevnnjodan.
Vaikko ruhtasupmi iešguđet doaimmaide ii leat nu hirbmat stuoris, de lea goit dehálaš veahkki aktevrraide nagodit lágidit ja doaimmahit kultuvrralaš aktivitehta. Dasa lassin veahkeha kulturfitnodagaid olahit eambbo doarjaga ovdamearkka dihte fylkkagielddas ja Kulturráđis go báikkálaš doarjja lea addon.
Guovdageainnu Gurutbellodat lea ge moadde jagi áigi áŋgiruššan ásahit suohkanlaš kulturfoandda. Suohkanstivra lea ovttajienalaččat dorjon ahte mii geavahit Ymber-fitnodaga dietnasis oasi bidjat kulturfondii. Guovdageainnu Gurutbellodat áigu bargat ain boahtte válgaáigodagas doarjut kultuvrra ovdánahttima Guovdageainnu suohkanis.
