Dan lohká Guovdageainnu NAV jođiheaddji Marja Eira. Guovdageainnu NAV lea suohkana bušeahttamuddemis bivdán lasi 2 miljovnna sosiálabálvalusaide, go čájehuvvo ahte Guovdageainnus leat stuora váttisvuođat kredihttakoartageavahemiin.
Dan lohká Guovdageainnu NAV jođiheaddji Marja Eira. Guovdageainnu NAV lea suohkana bušeahttamuddemis bivdán lasi 2 miljovnna sosiálabálvalusaide, go čájehuvvo ahte Guovdageainnus leat stuora váttisvuođat kredihttakoartageavahemiin.
Boahtte suohkanstivrras galgá Guovdageainnu suohkanstivra meannudit bušeahttamuddema, gos okta čuokkis lea birrasii 2 miljovnna lasáhus NAV sosiálabálvalusaide.
Guovdageainnu NAV kantuvrra hoavda Marja Eira čilge ahte dál lea čájehuvvon ahte olbmuin Guovdageainnus leat stuora váttisvuođat kredihttakoarta geavahemiin.
Olbmot vealgáduvvon
Olbmot leat vealgáduvvon, ja dán váttisvuođa ii lean NAV nagodan einnostit juovlamánus go jahkásaš bušeahta hábmejedje.
Vuosttaš njealji mánu dán jagi lea golahuvvon 721 000 ruvnno eambbo go maid ledje rehkenastán. Dál leat bivdán 2 163 000 lasi dán jagi bušehttii.
– Lean ovdal váldán bajás politihkkariiguin ahte stuora servodagas lea kredihttakoarta váttisvuohta, ja dat váttisvuohta lea joavdan midjiide, lohká Marja Eira.
Son čilge ahte dát váttisvuohta ii lean diibmá, ja lea dál čuožžilan Guovdageainnus.
Sámi iešbirgenkultuvra váikkuhan
– Mii diehtit ahte leat olu kredihttakoartafitnodagat mat juohke ládje fállet kredihttakoarttaid, viđa minuhtas oaččut fáhkka 500 000 ruvnno. Jus olbmos ii leat ruhta, de oaidná dá lea jođánis čoavddus, čilge Eira.
Son lohká ahte váttisvuohta dainna lea go fitnodagat fállet ahte ii dárbbaš máksit ovdal jahkebeali maŋŋil, ja dalle álget stuora reanttut gártat.
Dasto sáhttet čuožžilit olggosgolut maid eai lean rehkenastán, go kredihttakoarta šattai divrasit go maid álggos jáhkke.
Eira árvvoštallá ahte sámi kultuvra sáhttá dagahit ahte olbmot eai oza veahki nu jođánit, go sámis lea iešbirgejeaddji kultuvra garas.
– Sáhttá nu ahte olbmot vurdet veaháš guhkibut ovdal duođas oidnet ahte dán ii nagot čoavdit. Dat okta rehket sáhttá de sturron máŋggageardánit. Geaidnu NAVii sáhttá leahkit losses lávki, go jurddašit jus lea rehket mii lea duššo 10 000 ruvnno, muhto dan dihte oaidná ahte ii nagot máksit. Buohkat eai soaitte diehtit rivttiid mat leat, lohká Eira.
Ávžžuha vuos gulahallát fitnodagaiguin
Guovdageainnu NAV kantuvrra hoavda ávžžuha olbmuid jearrat veahki dakkaviđe go oidnet ahte olggosgolut leat eambbo go sisaboahtu, go juohke olbmos lea riekti sosiálalága mielde oažžut veahki jus ii nagot máksit birgemuša ovddas.
– Mii veahkehit olbmuid beassat julggiid ala. Olbmuin lea riekti ahte lea dáhkki oaivvi badjel ja biebmu beavddi alde. Dat lea maŋemuš sihkkarvuohta. Ávžžuhan vuos olbmuid ieža geahččalit inkássofitnodagaiguin čoavdit ášši, ja ráhkadit govttolaš máksinplána. Hui dávjá ii dárbbaš eambbo go dan dahkat, lohká NAV jođiheaddji.
Eira neavvu ahte NAV:s oažžu sámegielat veahki, ja sáhttá diŋgot sámegielat bargiin ságastallama sin neahttasiiddus.
Ovttajienalaš ovdagoddi dohkkehii
Áššečilgehusas čuožžu ahte eai leat leamaš ná olu vealgeáššit ovdal.
NAV Sosiálabálvalus bargá stuora vealgeáššiiguin, ja go olbmuin ii leat ráđđi láiggu máksit ja biepmu oastit, de lea sis riekti oažžut veahki.
Ovttajienalaš ovdagoddi evttohii dohkkehit bušeahttamuddenevttohusa. Suohkanstivra galgá meannudit ášši geassemánu 16. beaivvi.
Guovdageainnu várresátnejođiheaddji Anders S. Buljo jáhkká váttisvuohta lea čuožžilan go lea nu álki oažžut kredihttaloanaid ja koarttaid.
– Dat fállojuvvojit nu álkit, ja soapmásat fillehallet váldit daid vaikke ii livččii ráđđi. In leat mihkke fágaolbmuid muhto lea min suohkanpolitihkkáriid ovddasvástádus daid gozihit ja gullat maid fágaolbmot ávžžuhit. Lea maid min ovddasvástádus váruhit ahte lea dan mađe ruhta dasa. Mii čuovuimet maid ledje evttohan, lohká Buljo.
