Duorastaga geassemánu 25. beaivvi almmuhii sámediggepresideanta Aili Keskitalo ahte son ii hálit ođđasisválgga sámediggepresideantan 2021:s.
– Norgga Sámiid Riikasearvvi (NSR) bealis háliidan giitit Ailli dan barggu ovddas maid son lea bargan sihke NSR:i ja sámi álbmogii buorrin, dadjá Runar Myrnes Balto, NSR jođiheaddji.
Leamaš presideantan golmma áigodaga
Keskitalo lea leamaš sámediggepresideantan golmma áigodaga oktavuođas 2005 rájes, ja lea dál válljejuvvon presideantan 2017 rájes 2021 rádjái.
– Mun lean giitevaš dan luohttámuša ovddas maid sihke NSR ja sámi jienasteaddjit leat čájehan munnje, ja dáhkidan ahte áiggun geavahit buot návccaidan dan bargui mii ain galgá dahkkojuvvot dán sámediggeáigodagas, dadjá Keskitalo.
NSR jođiheaddji 2003 rájes
Keskitalo válljejuvvui NSR jođiheaddjin 2003:s, ja lea searvan presideantaevttohassan NSR ovddas njeallje háve. Dál oaivvilda Keskitalo ahte sihke sutnje persovnnalaččat ja organisašuvdnii lea áigi háhkat ođđa presideantaevttohasa.
– Aili lea leamaš politihkalaš láidesteaddjin Sámis dan rájes go vuosttaš nissonolmmožin válljejuvvui sámediggepresideantan 2005:s. Mii boahtit váillahit su sakka sámepolitihkalaš barggus, muhto mii ipmirdit bures ahte son dál háliida vuoruhit eará áššiid ovddos guvlui, loahpaha Myrnes Balto.
Čuovvovaš áiggis galgá NSR riikastivra ovttas organisašuvnnain bargat gávdnat ođđa presideantaevttohasa 2021 sámediggeválgii. Lea NSR riikačoahkkin mii loahpalaččat vállje ođđa presideantaevttohasa, mii dáhpáhuvvá Troanddimis golggotmánu 2.–4. beaivvi.
