Sámediggepresideanta Aili Keskitalo oaivvilda ahte ráđđehus ii daga gullin ge váttisvuođa birra go birrasii 50 proseantta sámi nissoniin vásihit dovduičuohcci, fysalaš dahje seksuála veahkaválddálašvuođa.
Sámediggepresideanta Aili Keskitalo oaivvilda ahte ráđđehus ii daga gullin ge váttisvuođa birra go birrasii 50 proseantta sámi nissoniin vásihit dovduičuohcci, fysalaš dahje seksuála veahkaválddálašvuođa.
Oslo Met vuosttašamanueansa Astrid Eriksen lea geahčadan Saminor loguid, mat bohtet ovdan guorahallamis man Romssa universitehta lea čađahan. Lagabui 50 proseantta sámi nissoniin leat vásihan dovduičuohcci, fysalaš dahje seksuála veahkaválddálašvuođa, čállá Klassekampen.
Eai daga gullin ge
NRK Sápmi dieđiha ahte juohke viđat sámi nisu lea vásihan seksuála veahkaválddálašvuođa. Oktiibuot 12 000 nissona serve guorahallamii, geat gullet 25 suohkanii Trøndelágas ja Davvi-Norggas.
Sámediggepresideanta Aili Keskitalo cuiggoda ráđđehusa go eai daga gullin ge váttisvuođa. Go son lea čoahkkimiin iešguđet departemeanttain, earenoamážit go áigu hupmat veahkaválddálašvuođa sámi servvodagain, de lohká vásihit «vuordde ja áicca» láhttema. Keskitalo lohká ahte geažuhuvvo ahte sámi servvodat ferte ieš čoavdit dán váttisvuođa.
– Mii dárbbašit dutkama vai gávdnat siva, ja mii dárbbašit guovddáš eiseválddiid geat sáhttet bidjat doaimmaid johtui ja čuovvulit daid. Mii fertet oažžut sámi dievdduid ja bártniid mielde, ja ahte sii ságastit veahkaválddálašvuođa birra ustibiiguin ja bártniiguin, lohká son.
Ii hálit eanet plánaid álggahit vuos
Justiisaministtar Tor Mikkel Wara čállá e-poasttas Klassekampenii ahte ráđđehus vuoruha barggu veahkaválddálašvuođa lagasbirrasa vuost.
– Mii fertet doibmii bidjat daid plánaid mat jo leat ovdal go álggahit eanet plánaid. Mii dárbbašit doaimmaid – eat ge eanet plánaid, lohká Wara.
(©NTB)
