Dat boahtá ovdan dutkanraporttas ja dutkit oaivvildit hávgabivdu sáhttá čuohcat luossamáddodahkii.
– Unnit stuora «kannibálahávggat» mearkkaša ahte eanet smávit hávggat sturrot gaskasturrosaš hávgan mat borret luossaveajehiid, dadjá senioraráđđeaddi Martin A. Svenning preassadieđu bokte.
2021 rájes ii leat lohpi luosaid bivdit Deanu čázadagas vai luosat lassánit.
Deanučážadaga guolástushálddahus álggahii guorahallama 2021:s mas dutke 1562 hávgga. Dat čájehii ahte gaskasturrosaš, 40–60 cm guhkkosaš hávggat leat dat hávggat mat borret eanemus luossaveajehiid. Bealli das maid dat borret beaivái leat luossaveajehat.
Stuorra hávggat baicce borret unnit luossaveajehiid ja maiddai stuorra guliid nugo čuovžža, hávgga ja hárri. Unnimus hávggat borre ges eambbo bodneelliid, divrriid ja bišáŋkkiid (stingsild).
– Hávga lea kannibála, nu ahte unnimus hávggat borahallet stuorat hávggaide. Danin dat «orrot» veahá olgobeale daid guovlluid gos leat olu stuorra hávggat gos čogget luossaveajehiid. Dat gaskasturrosaš hávggat orrot dego spesialiseren borrat luossaveajehiid, lohká Svenning.
Danin lea nu jus bivdit stuorra hávggaid, de cevzet eanet smávvahávggat ja dat lassánit de Deanučázádagas, go eanet smávvahávggažat bállejit stuorrut gaskasturrosaš hávgan.
– Eará sániiguin dat sáhttá dahkat ahte eambbo smávva ja gaskasturrosaš hávggat iskagohtet guovlluid gos luossaveajehat vánddardit ja dat sáhttá čuohcat luossaveajehiidda. Danin sáhttá stuorra hávggaid bivdin Deanus buktit nuppelágan bohtosa go dan maid sávvat, dadjá Svenning.
(©NTB)
