Ovdal go poastabiila finada gilis, de manná eallin dábálaččat gilis. Nu go juohke jagi de leaba ránnjááhkut easkka juovlamánu čuovganeamis dáikkihan ahte juovlamánnu dat leage juo álgán. Iđđesárrat leaba juo livkimin ja giccodeamen juovlačuovgakábeliiguin.
Dát fearánat ránnjážiid birra leat dáhpáhuvvan ovtta gilážis, na soaitá vaikke Jergolis, Mázes, Sirpmás dahje Gáivuonas, gii dan diehtá. Ránnjážiin leat goit, nugo ránnjážiin lávejit ge, olu somás ja muhtun eai nu somás dáhpáhusa. Ráhkesvuohta, birgejupmi ja balahahkesvuohta dagahit olu bárttiid giliolbmuide.
Dán jagi beassabehtet gullat nuppádassii juovlakaleandara mii almmuhuvvui juovlamánu 2018:
Jahki lea golihan dan rájes go maŋemus gulaimet ságaid Kirstii, Mortenii, Firkkal-reŋgii, ránnjááhkuide ja earáide gilážis. Olu čáhci lea golgan jogas mii giláža čađa golgá. Eai leat dušše sáivačázit mat vássán jagi leat goikkuid čáskadan.
Muhtumat leat váibmilat vel mearračáhcái ge šaddan ja fuobmán ahte dat lea buorre vaikko makkár mielaide. Nu go muitit, de lea Kirste mearrasámi bártni, girječálli Lásse fasken, ja niegada šaddat gili áidna girječálliáhkkán. Jagi ovdal lea Lásse fárren gili láigovissui ja Kirste lea iežas mielas oalle ruovdi gii dan lea fasken.
Muhto, ii hal dat girji goasse oro almmuhuvvomin, ja Kirste gal lea dakkáraš nieida gii ii gierdda beare guhká jus dievddut su ruhtabursii čuohcagohtet. Divrras hal rávis dievdoolbmo lea biebmat.
Gili lunttat jávkan jagi juo
Gili stuora šarmørat Morten ja Firkkal-reaŋga leaba ain Báhčaveaji guovllus ohcame meteorihttabázahusaid. Firkkal-reaŋga han lei lohkan aviissas ahte jus daid gávdná, de gal duháhiid beassaba máhccugoahtit ruhtabursii. Jagi juo leaba jávkan, ja go duođaid galgá muitalit, de gal leat giliolbmot áigá juo heaitán jáhkkimis ahte goassege ruhtaalmmájin daiguin meteorihttabázahusaiguin šaddaba.
Čuovo fal mielde mo ránnjážiiguin manná juovlamánus!
