Politiijain lea doarvái bargu leamaš mannan ija.
Ii leat mannan idja politiijaide leamaš duođi eambbo dramáhtalaš, muhto bargat dat gal leat beassan.
Álggii vuos Álttás gaskaija áigge: «Bođii diehtu ahte feasta priváhta viesus muosehuhttá. Mii váldit ášši».
Čáhcesullos fas bissehedje máŋga mopeda go vudje čuovggaid haga. Golbmasa gohččo divvut čuovggaid.
Diimmu maŋŋel ges Álttás lea muhtun álgán mašiinnaiguin bargat. Politiijat isket váidalusa mii lea.
Vel diimmu maŋŋel de fas Álttás šadde politiijat giddet ovtta feasta gosa ledje čoahkkana 40-50 nuora.
Nuorta-Finnmárkkus fas leat dakka maŋŋel politiijat leamaš feasttas ja bissehan dan, gos ledje máŋga vuolleahkásaš nuora. Daid leat politiijat dolvon ruovttuide.
Álttás fas ožžo politiijat dieđu ahte olbmot čohkkájit luotta alde gos biila johtolat lea. Politiijat ledje báikkis ja gohččo sin lávkánit eret luotta alde.
Čáhcesullos fas doarrájedje muhtumat guovtti áigge ihkku. Politiijat čorgejedje doppe maid báikki.
Sullii seamma áigge ožžo politiijat dieđu Hámmárfeasttas ahte muhtun olmmoš lea nohkkan ovtta latnjii priváhta viesus. Viessoeaiggát ii dovdan olbmo, ja riŋgii politiijaide. Politiijat dolvo oađđiguossi ruoktot.
Njealji áigge šadde politiijat gohččut guoktása Álttás guođđit gávpotguovddáža go leigga muosehuhttán doppe.
Girkonjárggas lei okta feasta leavvan nu ahte viessoeaiggát dárbbahii veahki gurret viesu. Politiijat dat gal ledje báikkis ja feasta maid nogai.
Ovtta olbmo šadde politiijat doalvut giddagassii, go lei beare gárremin. Ii čuoččo lei dat olmmoš feasttas maid bissehedje.
Guovdageainnus leat heajat leamaš vahkkoloahpas, ja de diehttelasat čoahkkanit olbmot maid. Logi váile beal čiežas dál iđđes ožžo politiijat dieđu ahte lea rigearra ovtta viesus, feasta geažil. Politiijat finadedje doppe maid.
