Kárášjoga gieldda dispalávdegotti ovtta čoahkkimis suoidnemánus lea dušše okta miellahttu meannudan áššiid. Lávdegotti jođiheaddji čuožžu čoahkkinbeavdegirjji mielde leamaš mielde, muhto ieš lea eahpesihkar ahte searvvai go, go lei luomus máddin.
Kárášjoga gieldda dispalávdegotti ovtta čoahkkimis suoidnemánus lea dušše okta miellahttu meannudan áššiid. Lávdegotti jođiheaddji čuožžu čoahkkinbeavdegirjji mielde leamaš mielde, muhto ieš lea eahpesihkar ahte searvvai go, go lei luomus máddin.
Ávvir lea geahčadan ohcamiid, maid gieldda dispalávdegoddi lea meannudan dan rájes go bievlavuodjin álggii. Earet eará vuhtto ahte lávdegotti fásta miellahtut eai leat searvan čoahkkimiidda ja muhtin čoahkkimis leamaš dušše okta miellahttu, gii lea vuolláičállán ohcamiid.
Ii šat vástidan
Dispalávdegoddi lea poastalisttu mielde oktiibuot meannudan 156 ohcama geasseáigodagas, main ealgabivddu oktavuođas leamaš 65 ohcamuša.
Ávvir ii goittot leat beassan oaidnit buot ohcamiid ja ággan leamaš dat ahte gieldda bealis ii leamaš daid áigi sáddet.
Dieđuid vuođul, maid Ávvir lea ožžon, de leamaš fásta čoahkkinbeivviid lassin vel máŋga liigečoahkkima earet eará bealálašvuođa geažil.
Čoahkkinbeavdegirjji mielde suoidnemánu 8. beaivvi, ii leat eará go okta miellahttu, Gunn Anette Aslaksen, searvan čoahkkimii ja vuolláičállán 52 ohcama, maid orru okto meannudan dán čoahkkimis.
Lei luomus
Ávviris lei čálalaš oktavuohta Aslakseniin, gos ovdanbuvttii iešguđet gažaldagaid ja son vástidii. Muhto go Ávvir jearai manin son lea okto vuolláičállán čoahkkinbeavdegirjji, de ii šat vástidan, iige lean maŋŋebárgga fáhtemis ságaide, go lei váldán luomu barggus.
Ávvir válddii oktavuođa dispalávdegotti jođiheddjiin. Olav Sara Nikkineniin, čielggadit meannudeami čađaheami ja jearran dihte čoahkkima birra mii čađahuvvui suoidnemánu 8. beaivvi.
– Dalle gal čuožžila mus maiddái gažaldatmearka diesa, dovddasta son.
Eahpesihkar ahte searvvai go
Ávvir jearrá Nikkinenis searvvai go son dán čoahkkimii ja son vástida ahte ii searvan, go lei luomus máddin. Ávvir jearrá de ahte lea go nu áddemis, ahte Aslaksen lea okto meannudan ohcamiid.
– Dan mun gal in leat nu sihkar, go mii leat telefuvnna badjel maiddái háleštan. Aslaksen lea riŋgen munnje moddii go ledjen máddin, čilge son.
Ávvir čujuha de čoahkkinbeavdegirjái, mas čuožžu ahte son ja Gunn Anette Aslaksen leaba searvan čoahkkimii, muhto lea dušše Aslaksen gii lea vuolláičállán čoahkkinbeavdegirjji ja 52 ohcama. Nikkinen šaddá de ieš eahpesihkarin ahte lei go čoahkkimis, vai ii.
– Mun ferten gal iskat dien, ahte lea áibbas sihkar, lohká Nikkinen, gii lohpida iskat ášši bearjadahkii.
Váttis luomus
Muđui vástida Nikkinen manin čoahkkimiidda eai leat fásta miellahtut searvan. Ovtta čoahkkimii searvvai maiddái sátnejođiheaddji ovttas Gunn Anette Aslakseniin.
– Geasset lea luopmoáigi ja čoahkkinplána šaddá hui moalkájin, erenomážit suoidnemánus, čilge son.
Dasa lassin čilge lávdegotti jođiheaddji sin fertet čađahit liigečoahkkimiid, gos earet eará gieđahallet hoahppoáššiid. Dán son ii oainne váttisvuohtan.
Dohkkehan guktii
Ávvir jearrá maiddái manin ovtta ohcama leat guktii meannudan, vaikke lea vuosttaš čoahkkimis jo dohkkehuvvon. Beaivemearit goittot leat áibbas eará sihke ohcamis ja meannudeamis. Dasa lassin lea vuodjinruvtto rievdaduvvon ovttain namain.
– Dien birra in dieđe mun maidige, go in leat ožžon dieđuid dan birra man láhkai lea meannuduvvon. Diesa in sáhte vástidit maidige, ovdal go lean iskan ášši, deattuha Nikkinen.
Ávžžuhus iige gáibádus
Dat mii guoská ealgabivddu oktavuođas sáddejuvvon ohcamiid ektui, de čuožžu gieldda iežas meannudannjuolggadusain, ahte vuojána registrerennummar galgá ovdanboahtit ohcamis.
63 ohcamis, maid Ávvir lea beassan oaidnit, váilu bealis dát nummar. Njuolggadusain goittot čuožžu hui jorbasit ahte dát berre leat mielde, muhto ii sáhte dulkojuvvot gáibádussan.
– Mii čuovvut hui dárkilit njuolggadusaid ja lea várra mannan meattá dát váilevašvuohta. Muhto sihkkelnummar ii leat čadnon sierralohpái, go lea persovnnalaš, deattuha Nikkinen, gean mielas lea boastut dan gáibidit.
