Niina Siivikko joatká Sámedikki ságajođiheaddji Pirita Näkkäläjärvi veahkkebargin. Son lei doaimmas maid ovddit válgabajis 2022 čavčča rájes gitta 2023 loahpa rádjái.
Sámedikki ságajođiheaddji veahkkebargin lea filosofiija magisttar Niina Siivikko virgáduvvon. Sámediggi almmuhii ságajođiheaddji veahkkebargi virggi ohcanláhkai guovvamánus.
Sámedikki ságajođiheaddji veahkkebargi bargguide gullá veahkehit ságajođiheaddji politihkalaš ja hálddahuslaš bargguin. Veahkkebargi válmmaštallá ja ovdanbuktá dárbbu mielde stivrra, Sámedikki ja lávdegottiid čoahkkimiin iežas doaibmasuorgái gullevaš áššiid ja ollašuhttá daid mearrádusaid.
– Lean hui movtta go beasan joatkit Sámedikkis. Ságajođiheaddji veahkkebargi bargogovva lea hui máŋggabealat, miellagiddevaš ja hástaleaddji, ja lea gudni beassat bargat fas dehálaš barggu sámeservoša ovdii, cealká Siivikko preassadieđáhusas.
Avvillaš Siivikko lea árabut bargan iešguđetlágan prošeavttaiguin, earret eará Suoma ON-lihttui, sosiála- ja dearvvašvuođaministeriijai ja Turku universitehtii. Siivikko lea maid olmmošvuoigatvuođalihtu stivrra lahttu.
