Mánát geat ožžot fuomášumi ja geat leat mielde mearrideamis, sii loktet buoremusat mánáidgárddis.
Mánát geat ožžot fuomášumi ja geat leat mielde mearrideamis, sii loktet buoremusat mánáidgárddis.
Eanaš mánát loktet bures mánáidgárddis, čájeha oaiviliskkadeapmi mii lea dahkkon mánáidgárddemánáiguin.
Badjel 800 viđajahkásačča 60 mánáidgárddis leamaš mielde oaiviliskkadeamis, mo mánát loktet mánáidgárddis.
Eanaš oassi loaktá
94 proseantta vástidit ahte sii loktet hui bures dahje bures mánáidgárddis.
Njeallje proseantta vástidit ahte leat duhtavačča, ja guokte proseantta fas vástidedje ahte eai loavtte nu bures.
– Boarráseamos mánát mánáidgárddis ledje mielde iskkadeamis ja iskkadeami leat váhnemiid bokte dahkan, dadjá fágahoavda Nina Knarvik Norlandia Barnehagenis.
– Lea somá gullat ahte nie ollugat loktet bures mánáidgárddis, muhto lea maid dehálaš diehtit manne buohkat eai leat loavtte nu bures. Mii fertet duođalaččat váldit daid mánáid geat lohket eai loavtte, dadjá Knarvik.
Dehálaš oaidnit signálaid
Son oaivvilda ahte buohkat galget oažžut dan buori mánnávuođa mánáidgárddis.
– Lea dehálaš gulaskuddat mánáiguin ja váldit duođas daid signálaid vai mánát loaktigohtet ja leat mielde vásáhusain gos dovdet ahte sii nagodit ja máhttet. Mis lea dieđusge buorre oktavuohta váhnemiiguin ja čuovvut dáid viidáseappot, dadjá Knarvik.
Mielde mearrideames
87 proseantta vástidit ahte sii besset leat muhtimiid mielde mearrideames maid sii galget bargat mánáidgárddis, muhto 13 proseantta vástidit fas ahte sii eai leat goassige mielde mearrideames.
Mánát ahtanuššet go besset leat mielde mearrideames.
– Mánát geat vásihit sii váldojuvvojit duođas ja ožžot mielde mearrideamis, loktet buorebut. Eai dieđusge sáhte álo mielde mearrideamis, muhto sii sáhttet beassat muhtimiid mearridit, gosa galget tuvrii ja makkár doaimmaid dál galget bargat, dadjá son.
Skihpárat ja dukkoraddan
Buori skihpárat ja suohtas ovttas duhkoraddat, dat lea dehálaš loaktimii.
– Mánáin geain eai leat skihpárat, vástidit ahte eai loavtte nu bures mánáidgárddis. Dan lea dehálaš bargiide oaidnit. Vuođđu mánáid loaktimis ja ovdáneamis mánáidgárddis lea skihpárat ja lagašoktavuohta ollesolbmuide, dadjá Knarvik.
Iskkadeapmi
Mánát ožžo logi gažaldaga loaktima ja ovttastallama birra, mánáid ja ollesolbmuid gaskavuođa birra.
Ovdamearkka dihtii dáid gažaldagaid: Liikot go mánáidgárddis? Láviidet go ollesolbmuiguin suohtastallat ovttas? Beasat go mielde mearrideamis maid mánáidgárddis doaimmahit? Leago dus skihpárat mánáidgárddis?
