Sihke Finnmárkku ja Romssa Politijaguovddážis lea jaskes idja leamaš.
Finnmárkku Politijaguovlu dieđiha twitteris ahte politiijat vižže ovtta 30 jahkásaš dievddu priváhta viesu luhtte Hessengas, Girkonjárggas, go lei muosehuhttán olbmuid doppe . Seammá viesu luhtte váldui okta 20 jahkásaš nissonolmmoš giddagassii ja váidojuvvo veahkaválddálašvuođa ovddas politiijaid vuostá.
Romssas bidje politiijat ovtta 40 jahkásaš dievddu juhkanvuođaarreasttai go muosehuhtii olbmuid ja dearppai lásiid ovtta priváhta viesu luhtte Romssa gávpogis. Olmmái ii nagodan váldit vára alcces, ja danne bidjui juhkanvuođaarreasttai.
Romssa politiijat ožžo maid dieđu ahte muhtun lei vahágahttime dahje báhkkeme sisa ovtta vistái Romssas. Go politiijat bohte báikái de čájehuvvui ahte lei vártnuheames dievdu gii lei dearpan boastakássaid lahkosis.
Politiijat vižže maid ovtta olbmá doaktárkantuvrra luhtte Romssas ja bidje su juhkanvuođaarreasttai go su láhtten dagahii váttisvuođaid doaktárkantuvrras.
