Mannan ija dieđihuvvo leat leamaš oalle jaska Finnmárkkus politiija Twitter dieđuid mielde, dušše Hámmárfeastta politiijain lei veháš eanebuš bargu.
Mannan ija dieđihuvvo leat leamaš oalle jaska Finnmárkkus politiija Twitter dieđuid mielde, dušše Hámmárfeastta politiijain lei veháš eanebuš bargu.
Politiijat ja dearvvašvuođabargit šadde odne iđđedis vuolgit muhtin čujuhussii Máhkarávjjus, go ledje ožžon dieđu doppe lea olmmoš čukkohallan. Ii oktage dan báikkis diehtán ášši dilis eai maidige.
Beana galbmon
Hámmárfeastta politiijat ožžo dieđu ahte muhtin ássanbráhkain lei rikkeara ja huikkas, dohko eai asttan politiijat vuolgit.
Politiijat šadde baicce muhtin priváhtadállui vuolgit, gos dieđihuvvui leat riidu, doppe sii bagadalle mo gulahallat ja čovde váttisvuođaid.
Hámmárfeasttas gávdnui maid beana čatnon ja galbmon olggobeallái muhtin olgobáikki. Politiijat gávdne beanaeaiggáda gii lei olgobáikkis juhkamin ja lei garrasit oaivvahuvvan. Almmái gohččojuvvui váldit vára beatnagis.
Muhtin almmái biddjui fas giddagassii go lei rikkeren ja muosehuhttán olbmuid muhtin hoteallas Hámmárfeasta gávpogis. Almmái lei badjelmeare juhkan ja ii ge sáhttán man ge láhkái iežas áimmahuššat.
Hámmárfeasttas ledje maid geaidnopolitiijat jođus mannan ija, sii bissehedje ja dárkkistedje muhtin biilavuoddji geas lei alla leaktu. Biilavuoddji gávnnahalai vuodjinkoartta haga vuodjimin. Politiijat váidet biilavuoddji.
Biila badjel geainnu
Porsáŋggus gávdnui biila mii lei vuoddján badjel geainnu beaze njeaiga. Vuoddji lei báhtaran báikkis.
Áidejávrris fas vuddjo jámas guokte bohcco guorbmebiilii. Boazoeaiggát lea ožžon dieđu dan birra.
Guovdageainnus lei maid muhtin dálus rikkeara, gos čuojahuvvui musihkka jitnosit ja olbmot eai bállen oađđit. Politiijain ii lean vejolašvuohta mannat báikái.
Mátta Várjjagis šadde politiijat fitnat muhtin dálus gohččumin geahpedit feastarieja.
