Politiijat eai vel dieđe mii lea dáhpáhuvvan.
Politiijat eai vel dieđe mii lea dáhpáhuvvan.
Mánnodatiđida gávdnui jápmán olmmoš Čáhcesullos. Ledje meaddelmanni olbmot geat gávdne olbmá ja dieđihedje politiijaide.
Ain dutkamin ášši
Finnmárkku politiijaid operašuvdnajođiheaddji Stein Hansen lohká Ávvirii ahte politiijat leat vuos dutkame ášši.
– Mii diehtit ahte son lea gávdnon Tollbugáhtas Čáhcesullos, ja dutkat dál viidásit, lohká Hansen.
Sii eai dieđe vel mii lea dáhpáhuvvan. Politiijat eai sáhte vel muitalit olbmo identitehta.
– Mii eat jáhke ahte lea rihkusdáhpáhus, muhto dutkat dan maid, lohká operašuvdnajođiheaddji.
iFinnmark aviisa čállá ahte báikkis lei doavttir, guokte ambulánssa ja politiijabiila. Hansen logai aviisii ahte ledje geahččalan heahteveahki doaimmahit go ollejedje báikái.
