Lassin ráidovázzimii leat eará doaimmat vel lassin vahkkoloahpa prográmmas.
Sápmi Pride dán jagi ávvuduvvo dán vahkkoloahpa Heahtás. Dáhpáhusas ovddasta nuoraidráđi ságadoalli Anni-Sofia Niittyvuopio Sámedikki.
Sápmi Pride lágiduvvo jahkásaččat iešguđet guovlluin miehtá Sámi. Lassin ráidovázzimii leat máŋggalágan doaimmat prográmmas buot ahkásaččaide.
Ráidu vuolgá Heahtá skuvlla luhtte lávvordaga, borgemánu 12. beaivvi diibmu 12.
– Vahkkoloahpa áigge ordnet ovdamearkka dihte galbabargobáji, ságastallanpanelaid ja bearašustitlaš eahkedoaluid rávesolbmuid eahketdoaluid lassin. Maiddái psykososiála doarjaga ovttadat Uvja lea mielde dáhpáhusas, muitala nuoraidráđi ságadoalli Anni-Sofia Niittyvuopio preassadieđáhusas.
Ovttaveardásašvuohta lea dehálaš árvu Sámedikkis
Sápmelačča dásseárvu ja ovttaveardásašvuohta leat loktejuvvon Sámedikki doaimma árvun maiddái válgabaji 2020–2023 doaibmaprográmmas.
– Lea buorre ahte dát dehálaš árvvut oidnojit min doaimmain maiddái olgguldasat. Erenomážit dat lea dehálaš ahte buohkat servodagas dovdet ahte sin dohkkehit dakkárin go sii leat, dadjá várreságajođiheaddji Leo Aikio.
