Jagi áigi go avvir.no almmuhuvvui

Odne mii ávvudit ahte min neahttasiidu lea jagi doaibman. Lea jagi áigi beaivvát ala go mii almmuheimmet avvir.no. Go ođđa neahttasiidu almmuhuvvui, leat rahppon eambbo vejolašvuođat movt almmuhit áššiid.

Miellagiddevaš jahki

Neahttajođiheaddji Berit Marie Lise Eira mielas lea dá leamaš miellagiddevaš jahki.

– Álggus ledje veahá teknologalaš hástalusat, muhto go dat vuos čoavdásedje, de gal manai hui bures. Leat beassan geahččalit olu ođđa diŋggaid, earret eará videoáššiid almmuhit, debáhttaprográmma, juovlaráiddu ja govvagalleriija, muitala son.

Álo buoridanmunni

Lea álo juoga man sáhttá buoridit ja ovdánahttit ođđa teknologiijain.

– Jurdda lea ain ovdánahttit ja buoridit neahttasiiddu. Lea buorre nu go lea dál, muhto ođđa teknologiijain sáhttá vel buorebun šaddat, ja dat lea ge okta mihtuin, čilge Ávvira neahttajođiheaddji ja lasiha:

– Lean hui duhtavaš maid mii leat olahan oanehis áiggis, ja lean maid hui movttet go lohkkit leat duhtavaččat.

Olu oahppan oanehis áiggis

Ávvir lea álggu rájes dušše báberaviisa, ja lei olu maid galggai oahppat oanehis áiggis go neahttasiidu galggai almmuhuvvot.

– Vuosttaš jahki lea leamašan dakkár jahki go leat olu oahppan oanehis áiggis. Mis lei nanu čehppodat buvttadit báberaviissa, ja dovddan dál ahte min doaimmahus lea bures oahppan buvttadit ja heivehit áššiid nehttii maiddái. Olles doaimmahus lea šaddan rievdadit sajáiduvvan bargovugiid ja vuogi mo jurddašit áššiid birra, dál go buvttadit sihke nehttii ja báberaviisii, čilge váldodoaimmaheaddji Kari Lisbeth Hermansen.

– Mii leat maid ferten veaháš muddet áigumušaideamet bargonávccaid ektui. Dat dieđusge ii mearkkaš ahte mis eai leat ain áigumušat ja ovdánahttinplánat, go dat mis gal leat, muhto muhtun áigumušaid ádjána guhkit olahit.

Ožžon olu rámi

– Olbmot orrot bures váldán vuostá neahttasiiddu ja mii leat ožžon olu rámi, mii movttiidahttá olles doaimmahusa ain bidjat eanet návccaid neahttasiidui. Neahttasiidduin mii maid olahit lohkkiid viidábut go báberaviissain, ja lea hui somá čuovvut mielde mo lohkkiidlohku avvir.no siiddus leamašan vuosttaš jagi ja man olu lohkkit guđege áššis leat, lohká Kari Lisbeth Hermansen.

Neahttasiidu leamaš nuvttá

Olu neahttaaviissat gáibidit mávssu earenomáš áššiin maid sii almmuhit neahtas.

– Mii eat leat dassážii bidjan vel maidege nu gohčoduvvon «máksinmuvrra» duohkái ja buot sisdoallu siiddus lea leamašan nuvttá buohkaide. Nu go eará ge aviissat, de fertet mii maid dieđusge áiggi mielde bidjagoahtit muhtun ráje áššiin máksinmuvrra duohkái. Ođđasiid máksá buvttadit ja daid ovddas ferte váldit mávssu, seamma ládje go eat skeŋke báberaviissa, čilge Hermansen.

Buorre ovdáneapmi Ávviris

Ávvira stivrajođiheaddji lea duđavaš bargguin maid Ávvira doaimmahus lea bargan.

 – avvir.no almmuheapmi lei buorre ovdáneapmi Ávvirii, ja dat galgá ovdánit vel eambbo. Ávvira neahttasiidu lea bures ovdánan dán jagis. Lea olu maid leat háhppehan dušše ovtta jagis. Buorit ja áigeguovdilis áššit juohke beaivvi, mat ođasmahttojit dávjá. Lean hirpmahuvvan man bures dat vuosttaš jahki lea mannan, lohka Ávvira stivrajođiheaddji Arne Reginiussen.

– Lohkkiidstatistihka mielde leat olu lohkkit juohke beaivvi, mii lea buorre mearka ahte lohkkit leat duhtavaččat. Mu mielas leat dán rádjái ovdánan bures, ja sáhttá šaddat vel buorebun, loahpaha Arne Reginiussen.

Eará mediaid oainnut

NRK Sámi ođasredaktevra, Rávdná Buljo Gaup:

– Dá lea okta dain stuorámus lávkkiin sihkkarastit sámi media ja sámi ođđasiid. Lea maiddái hui dehálaš NRK Sápmái ahte Ávvir maid lea almmuhišgoahtán neahttaáššiid.

Ságat redaktevra, Geir Wulff

– Hui buorre go Ávvir lea almmuhan neahttasiiddu. Lea dehálaš ahte sámi ođđasat bohtet oidnosii, ja ahte čalmmustahttá daid. Go olbmuin lea dat vejolašvuohta lohkat ođđasiid sámegillii lea hui dehálaš. Dán rádjái leat leamaš unnán ođđasat sámegillii, nu ahte lea hui buorre go Ávviris maid lea neahttasiidu dál.

Finnmarken redaktevra, Eilif Aslaksen

– Mun lean čuvvon neahttasiiddu álggu rájes, ja mu mielas lea Ávviris hui buorre sámi neahttasiidu. Go geahččá ja lohká neahttasiiddu, de boahtá hui bures ovdan ahte Ávvir háliida lihkostuvvat dáinna, ja leat lihkostuvvan bures. Bargiid ektui nákce bures juohkit áigeguovdilis áššiid.