Son oaččui gehččiid iežas beallái vuosttaš lávkemis juo, ja das maŋás beare eanet ja eanet rieja ráhkadahtii sin gaskkas.
Sámi beassášmárkaniid vuosttaš «Juoiganbattle» gesii unnán olbmuid, muhto sii geat ledje doppe, sii gal máhtte rieja ráhkadit.
Leige Guovdageainnu dievdu, Mathis Eira, gii ráimmai gehččiid dan muddui ahte sii ráhkadedje nu rieja go son lei ovdanbuktime ahte dat loahpas buvttii sutnje vuoittu.
Eira vuittii ge Juoiganbattle ja dakko bokte maid rámi ja 5000 ruvnno.
Skuvlii juoigannásttiid
– Go oidnen geat leat mielde, de in lean gal jáhkkit ahte galggan vuoitit, dajai son ieš maŋŋel.
Lei ge gal garra joavku geaiguin Eira gilvalii.
Vuos njeallje Sámi Grand Prix juoiganoasi vuoitit, Jan Ole Hermansen, Anders Nils Bongo, Per Bueng ja Johan Ivvár Gaup. Dasto lávlunoasi vuoiti ja máŋggageardde SGP oasseváldi, Inger Marie Nilut. Dasto vel Marit Susanne Utsi, gii lea jáhkkimis eanemus gerddiid searvan SGP lávlunoassái áiggiid čađa. Dasto vel Jon Isak Lyngman Gælok, gii lea ovdal searvan dákkár Juoiganbattle-gilvvuide.
Dovddus luđiid
Vuosttažat geat gevve eret gilvvus ledje Jan Ole Hermansen, Per Bueng, Johan Ivvár Gaup ja Jon Isak Lyngman Gælok.
Dalle várra fuomášuvvui ge oasseváldiid ja gehččiid gaskkas ahte dá ii leat dakkár dábálaš juoigangilvu.
Mathis Eira muitala ge maŋŋel gilvvuid ahte sus lei juo strategiija ahte juoigat dovddus luđiid.
– Mun jurddašin ahte daid dovdet olbmot ja de maid besset juoigat fárus. Dat strategiija orui doaibmame, go geahččit dahke eanemus rieja dalle go mu galge jienastit.
Juoiganbattle doaibmá ge nu ahte guovttis ja guovttis galget vuostálagaid juoigat. Dasto galget geahččit jienastit dainna lágiin ahte goabbá eanet rieja oažžu gehččiin, mihtiduvvon desibelámihtideami bokte, son beassá viidáseappot.
Nu lei ge Eira, son oaččui vel loahpas eanemus rieja gehččiin go gilvaleigga Anders Nils Bongoin finálas, ja vuittii de maid olles gilvvu.
Šovva
Láidesteaddji lei dovddus sámi neavttár, Mikkel Gaup.
Son muitalii maid maŋŋel gilvvuid ahte juoiganbattle lea dakkár mállet gilvu mas galgá gehččiid oažžut mielde rieja dahkat.
Nu orui ge Mathis Eira deaivan rivttes vugiin gehččiid oažžut mielde, juo vuosttaš lávkemis.
– Dát lea njuolggut šovva. Dáppe lei lohpi visot goansttaid atnit gehččiin oažžut rieja. Nu dat galgá leat nu, nu lea gilvu maid jurddašuvvon.
– Mun mielas ledje olu olbmot ja olu rieja dahke. Soaitá lei veahá amas gilvu, muhto jáhkán boahtte jagi lea eanet fuomášupmi dán šovvii, lohká Gaup.
Ávviriis ii leat lohku man olu geahččit ledje dán gilvvus.
