-Almmuhus-
VALÁŠTALLAN– In láve vuoitit go ii leat dehálaš

– In láve vuoitit go ii leat dehálaš

Journalista

-

-

Nu logai Norgga riikajoavkku čuoigi ja fállejohkalaš Finn Hågen Krogh ovdal Beaskáđasčuoigamiid, muhto son vuittii ja mieđiha ahte dat galgá leat erohus riikajoavkočuigiin ja dábálaš bargoolbmuin.

Go Ávvir humadii Finn Hågen Kroghain Suolovuomis ovdalaš gilvvuid, de ii lohkan iežas favorihttan go ii leat nu buori foarpmas, iige son láve nu bures čuoigat go eai leat dehálaš gilvvut.

– Leat ollu garra gilvaleaddjit mielde, dajai Krogh ovdal gilvvuid.

 

Buorre vuođđodássi

Go ollii mollii ja vuittii, ja gažaldahkii ahte go juo vuittii, mearkkaša go dat ahte Beaskáđasčuoigamat leat dehálaš gilvvut, de reaškkiha son ja lohká ná:

– In dieđe leat go dehálaš gilvvut, muhto mun jáhkán mus lea šaddan ollu buoret vuođđodássi go lean ollu jagiid hárjehallan garrasit. Go lea heajos foarbma, de doalan goitge alla dási, lohká son.

 

– Galgá leahkit erohus

Gilvvus čuoiggaiga Krogh ja Daniel Strand, gii bođii nubbin, njunnošis guhká fárrolaga.

Mun ledjen vuordán ahte munnos galggai šaddat gilvu gitta lohppii, in ge vuordán ahte son vuollánii nu áigá. Muhto, dat galgá leahkit erohus ovttas gii lea olles barggus ja riikajoavkočuoigis, lohká Krogh.


Daniel Strand, gii bođii nubbin. Govven: Ovlla Gaup

Man stuoris lea erohus čuoigat Beaskáđasčuoigamiid ja čuoigat máilmmicup gilvvuid stuora máilmmis?

– Dat gal lea stuoris, go lea máilmmicupa masa mun juohke jagi hárjehalan ja ráhkkanan, ja dát lea juoga masa mun somás dihte searvvan. Dál, go mus lea čuoigánáigodat nohkan, de searvvan dákkár čuoigamiidda somás dihte, eai ge dárbbaš leat makkárge vuordámušat. Dušše dat lea olles luopmu munnje, lohká Finn Hågen Krogh.

 

Gažaldahkii movt son lea vuostái váldon Beaskáđasčuoigamiin go lea násti Norgga čuoiganriikajoavkkus, lohká son ožžon veaháš fuomášumi.

– In dovdda iežan dego nástin, liikon dušše čuoigat ja lea nu lihkku mus go beasan dan dahkat olles áigge. Muhto lea hui somá dáppe ruovttuguovllus go olbmot čájehit beroštumi, go muinna lea mannan bures ja leat oaidnán TV:s. Ii livčče mange veara jus ii oktage livčče beroštan, nu ahte odne leat šaddan soames «selfie» govat olbmuiguin, lohká Finn Hågen Krogh.


Nissonluohká vuoitti Henriette Heitmann Mikkelsen. Govven: Ovlla Gaup

 

-Almmuhus-