-Almmuhus-
-Almmuhus-
OAIVEČÁLUS (Leder) Illusáhka go sámegielluohkkái lassánit oahppit

Illusáhka go sámegielluohkkái lassánit oahppit

-

-

Dán jagi leat eanet ohccit go leat leamašan máŋgga jahkái Gorravári áidna sámegielluohkkái. Dan stuorra oktavuođas dieđus ii leat dakkár stuorra ášši mii lebbejuvvo buot riikkamediain, muhto dan roassoáiggis mas máilbmi lea dál, de lea dat illusáhka masa odne háliidat dán čálasajis bidjat fuomášumi. Dat lea oainnat dan láhkai, ahte guokte jagi áigi ii lean oktage vuosttašluohkáoahppi ohcan Gorravári áidna sámegielluohkkái. Diibmá ledje čieža, ja bohte vel guokte čakčat. Muhto dál lea áibbas eará dilli, go dán jagi leat 11 oahppi geat álget vuosttaš luohkái čakčat.

Dat lea illusáhka sámi čuožžunsajis, go sámegielat mánát lasket stuorra báikkiin, go mánát ja nuorat han leat min boahtteáigi. Danne duođaid sávvat ahte sámegielluohkká šaddá báikin gos mánát duođaid loktet ja liikojit leat, go lea hui dehálaš sierra sámegielluohkkáide stuorra gávpogiin, go dat lea mielde ovdánahttime ja seailluheame sámegiela. Dan dáfus lea ge maiddái illusáhka olles sámegiela hárrái, muhto dieđus eanaš mánáid ektui geat besset oahppat skuvllas sámegiela ja sámegillii fágaid. Dat dieđus lea ollašuvvan go Álttá suohkan lágidii diehtojuohkinčoahkkimiid váhnemiidda geain ledje mánát geat galge skuvlii. Doppe čilgejuvvui maid dat mearkkaša jus mánná álgá sámegielluohkkái. Ahte skuvllat addet dan vejolašvuođa ahte sáhttá válljet sámegiela vuosttašgiellan, ja ahte lea čielga sámegielluohkká Gorravári skuvllas.

Dat lea illusáhka sámi čuožžunsajis, go sámegielat mánát laskeT
stuorra báikkiin, go mánát ja
nuorat han leat min boahtteáigi

Ii dieđus leat vuohččan go Álttás lea sierra sámegielluohkká, go 2009:s álggahuvvui sierra sámegielluohkká Gorravári skuvllas gos buot oahppu lei sámegillii. Muhto dalle geavai juo jagi maŋŋel, ahte ii lean oahpaheaddji dán luohkkái, go eai lean gávdnan dohkkehuvvon oahpaheaddji su sadjái gii dalle lei váldán virgelobi.


Sámegielat mánáide geat orrot dárogiel servodagain, lea erenomáš dehálaš oažžut oahpu sámegillii, go nu mii jáhkkit lea buoremus seailluhit giela. Nu lea ge Áltá buorre ovdamearkan dasa ja mii goit ávžžuhit dán ášši váldit hui duođas. Sávvamis leat dál buot diekkár bealit ortnegis go skuvllat álget boahtte čavčča vai sámegielat mánát eai gárta dakkár dillái ahte váilevašvuođaid geažil ii doaimma sámegielluohkká albma láhkai. Sámegielat mánáide geat orrot dárogiel servodagaiguin, lea erenomáš dehálaš oažžut oahpu sámegillii, go nu mii jáhkkit lea buoremus seailluhit giela. Dan dáfus lea ge Áltá buorre ovdamearka dasa, ahte mot stuorra gávpogat gos orrot eanebuš sámebearrašat sáhttet láhčit sin mánáide buoret vejolašvuođa válljet sámegiela.

- Advertisement -
-Almmuhus-