Guovdageainnu bártnit hárjehallet garrasit vai loahppageasi leat gergosat čavget oaivegávpogii, Norway Cupii, čiekčat spáppa.
Guovdageainnu 15-jahkásaš bártniid joavku leat guhkit áigge hárjehallan ja čoaggán ruđa dassái go loahppageasi čavgejit oaivegávpogii, Norway Cupii. Dán jagi lágiduvvo Norway Cup suoidnemánu 29. beaivvis gitta borgemánu 5. beaivái.
Vaikko illudit eanemusat spáppa čiekčat, de leat eará diŋggat maid doppe mat geasuhit.
Hárjehallan lea dehálaš
Bártnit leat hárjehallame Bákteváris go Ávvir finada sin ságain. Alla jienat, garra skuohtat ja reaškkas gullo go gaskkaneaset humadit ja movttidáhttet nubbi nuppi hárjehaladettiin.
Hárjeheaddji Marit Aune Buljo jođiha hárjehallama ja muitala čikčiide ain maid galget bargat. Muhtumin čužžot guovtte bealde spábbačiekčanšilju ja čikčet spáppa nubbi nubbái. Nuppe vuoru fas báhčet moala guvlui gos moallaolmmái fákte moala.
– Mii hárjehallat oalle dávjá, goit golmma geardde vahkkui, dadjá Kevin Mathias Henriksen (15).
– Mii hárjehallat sihke sáddet spáppa, viehkat ja čiekčat maid hui olu, dadjá Kain Ánte Buljo (13).
Ruhtačoaggin
Go nu guhkás galget vuolgit čiekčat, de fertejit ruđa čoaggit. Dan leat bártnit juo dahkan guhkit áigge ja leat ain čoaggime ruđa.
– Mii vuovdit loattaid, bargat iešguđetlágan bargguid ja feara maid vai mii dinet ruđa, muitala Kevin Mathias.
Illudit vuolgit oaivegávpogii
Go bártnit muitalit Oslo mátkki birra, de vuhtto ahte dát čiekčan lea dehálaš sidjiide. Norway Cup lea okta máilmmi stuorámus spábbačiekčamiin ja dat čohkke oaivegávpogii olbmuid miehtá máilmmi.
Bártnit mojohallet ja geahčestallet nubbi nubbái go Ávvir jearrá mii šaddá buot suohttaseamos Norway Cupas.
– Geahččat nieiddaid ja čiekčat dieđusge, mojohallá Jan Isaac Karlsen Keskitalo (14).
– Beassat gávppašit veaháš, orrut hoteallas ja čiekčat, šaddá hui somá. Šaddá gal suohttaseamos dieđus čiekčat, ja geahččat nieiddaid. Borrat maid, soitet ođđa biepmut doppe gávdnot, lasiha Kevin Mathias.
Norway Cup
Norway Cup lea internationála spábbačiekčan mii lágiduvvo Oslos gaskal 6- ja 19-jahkásaččaide. Dát čiekčamat leat lágiduvvon 1972 rájes. Dat lágiduvvo juohke jagi 31. vahkkus, ja lea okta máilmmi stuorámus spábbačiekčangilvvuin. Dán jagi lágiduvvo Norway Cup suoidnemánu 29. beaivvi rájes borgemánu 5. beaivvi rádjái.
Dehálaš doaibmat joavkun
Bártnit čikčet 11:eš čiekčama ja galget Norway Cupas maid čiekčat dan.
Dál leat vuosttaš jahki go 11:eža galget čiekčat.
– Mii fertet ovttasbargat dego oktan joavkun, ja báhčit moalaid, dadjaba Jan Isaac ja Kevin Henrik.
Bártnit mieđihit ahte mokta ii álo láve šat nu buorre jus leat vuoittáhallame.
– Go lea nulla-nulla, de lea mokta buorre, go mii nisttihit moala, de šaddá heajut ja heajut. De sáhttá šaddat eambbo negativitehta, muhto muđui mii gal leat hui positiivvat, dadjá Kevin Mathias.
Buohkat joavkkus leat olbmážagat ja movttidahttet nubbi nuppi.
– Mis lea hui buorre ovttasbargu hárjehallamiin, muhto go de boahtá čiekčan, de mii sáhttit šaddat veahá hušša, duođalaččat ja jierásnuvvat, dadjet Jan Isaac, Mihkkal Máhtte ja Kain Ánte.
– Danne lea dehálaš ahte mii hupmat nubbi nuppiin vai ii šatta nu Oslos, lasiha Mihkkal Máhtte Bongo Eira (14).
– Hui movttegis joavku
Hárjeheaddji Marit Aune Buljo dadjá ahte sis lea dál maid seamma strategiija go čađat lea leamaš. Go vuohččan čikčet 11:eš spábbačiekčama, de bidjet dieđus dasa maid eambbo fokusa.
– Dál lea vuosttaš áigodat go mii čiekčat 11:eža nu ahte mii bidjat olu fokusa hukset joavkku dan ektui. Sii eai leat vuos hárjánan dasa, nu ahte olu fokus šaddá maid mo čiekčat stuora šiljus, mo sáddet spáppa ja joavkočiekčan, čilge hárjeheaddji.
Hárjeheaddji vuohttá čikčiin dál, go hárjehallan lea sirdojuvvon olggos stuora spábbačiekčanšilljui, ahte Guovdageainnus ii leat dakkár vejolašvuohta dálvet.
– Mii han čiekčat eanas oasi jagis unna spábbačiekčanšiljožis, Báktehárjjis ja dat oidno dál. Muhto mu mielas sii barget hui buori barggu, dá lea hui movttegis joavku. Vaikko muhtumin ii mana nu bures, de sis lea hui buorre mokta.
Sávvet vásáhusa maid agibeaivvi muitet
Hárjeheaddji ii loga iežaset vuolgit Osloi nu alla vuordámušaiguin.
– Mii vuordit ahte dá šaddá fiinna mátki, ja ahte šaddá vásáhus maid agibeaivvi muitet. Muđui mis eai leat nu stuora vuordámušat, oaidnit doppe mo manná.
Bártniid spábbačiekčanáigodat lea juo álgán, go sii čikčet ráidočiekčamis. Dasa lassin galget sii vel Altaturneringis čiekčat vahkku maŋŋel Norway Cupa.
