Luonddugáhttenlihtu mielas lea buorre go guovžabivdu ii čađahuvvo Trøndelága davábealde.
Birasgáhttendirektoráhtta lea mearridan ahte ii čađahuvvo guovžabivdu davábealde Trøndelága dán jagi.
– Dat lea mearehis buorre ja dárbbašlaš vai guovžžat lasket, dadjá Luonddugáhttenlihtu fágajođiheaddji Arnodd Håpnes preassadieđáhusas.
Luonddugáhttenlihttu vuorjašuvvá go Norggas báhččojit menddo olu guovžžat.
Dehálaš vuoruhit
Oktiibuot galggaše 13 guovžža čivgat jahkásaččat, muhto Luonddugáhttenlihtu dieđuid mielde ii dáhpáhuva dat.
2018:s čivge gávcci guovžža ja dát fuolastahttá luonddugáhttejeddjiid.
– Dál čivget sakka unnit guovžžat go mearriduvvon Stuoradikkis, nu ahte dál lea áigi vuoruhit guovžanáli, lohká Håpnes.
Bivddu vuostá
Luonddugáhttenlihttu čállá preassadieđáhusas ahte Norggas leat báhččon badjel 100 guovžža 2010 rájes.
Sin mielas leat eiseválddit menddo láivvit bahčinlobiid ektui ja oaivvildit ahte guovžžaid báhčet ovdal go dat leat oba geargan ge speadjat badjelmeare olu buvttadanelliid.
Dássážii lea Birasdirektoráhtta addán lobi báhčit 11 guovžža mat galget leat vahágahttán eará elliid mat leamaš guohtumis.
– Ruškesguovža lea ráfáiduhtton ealli mii lea hearkkes dilis. Jus guovžžat galget laskat, de eai sáhte eiseválddit addit bivdolobiid earet dalle go lea áibbas dárbbašlaš. Dasa lassin ii galggaše liseansabivdu čađahuvvot daid jagiid go eai leat registrerejuvvon doarvái čivgamat Stuoradikki mearrádusa ektui, loahpaha Håpnes.
