Ikte dolvo Guovdageainnu suohkana bargit šilttaid politiijaide biillas man leat atnán vuojihit olbmuid guđet juvlastuolu dárbbahit, go lea beare divrras dan divuhit.
Ikte dolvo Guovdageainnu suohkana bargit šilttaid politiijaide biillas man leat atnán vuojihit olbmuid guđet juvlastuolu dárbbahit, go lea beare divrras dan divuhit.
Margrethe Gaup ja Irene Turi leaba heađástuvvan dál go biila mainna olbmuid vuojihit márkanis guđet juvlastuolu dárbbahit árgabeaivvis, ii leat šat doaimmas.
Ikte dolvo suohkana bargit šilttaid politiijaide, go biila ii leat šat dohkkehuvvon sivaid geažil.
Váddudan dili
– Mun in goit dieđe movt mii dál galgat go boarrásat ovdamearkka dihte dárbbahit sáhtu bátnedoaktára lusa, muhto leat seammás juvlastuollodárbbašeaddjit. Ii leat šat biila mainna sin vuojáhallat, go biila, mii lea adnon dasa, ii leat šat dohkálaš vuodjimii sivaid geažil, lohká Margrethe Gaup, guhte disdaga veahkehii iežas boarráseamos oappá bátnedoaktára luhtte fitnat.
Čoaggit ruđa
Margrethe Gaup boarráseamos oabbá lea Irene Turi eadni. Turi bidjá gažaldaga ahte šaddá go buohccibiilla riŋget juohke háve go juvlastuollodárbbašeddjiid galgá dolvvodit, nu go bátnedoaktára luhtte.
– Eai go eaktodáhtolaš searvvit ovttas Guovdageainnu suohkaniin nagot čohkket ruđa ja oastit dakkár biilla mii lea heivehuvvon juvlastuollodárbbašeddjiide, dahje juobe divvut ge dán biilla mas dál šaddan lea suohkan šilttaid váldit eret, jearrá Gaup, ja dakko bokte hástala Guovdageainnu servodaga maid searvat dakkár biilla ruhtadeapmái.
25 000 ruvnno divuhit
Guovdageainnu suohkana dearvvašvuođa- ja fuolahusa ovttadatjođiheaddji Kent Ailo Hætta muitala biila man birra lea sáhka lea 2000-málle.
– Biila ii leat leamaš nu buorre biila ja suohkan lea atnán ollu ruđa divuhit dan ja dál lea das turbo billahuvvan, man máksá birrasii 25 000 ruvnno divuhit. Biila ii leat EU-dohkkehuvvon.
(Ášši joatká gova vuolábealde)
Eat mearridan
Hætta ii loga diehtit movt olbmot leat geavahan dán biilla priváhta vuodjimii, muhto su ovttadagas ii leat dál oktage geavaheaddji gii dárbbaša dákkár biilla.
Hætta lohká juste dál lea unnán atnu dákkár biilii, muhto dárbbu ovddasguvlui ii dieđe.
Suohkanis lea láigobiilašiehtadus, ja sis lea dan bokte vejolaš láigohit biilla mainna lea vejolaš juvlastuollogeavaheddjiid vuojihit.
– Mii eat leat vel mearridan maid mii dahkat biillain, ja leat hupman divuhit dahje vuovdit dan. Fertet árvvoštallat gánnáha go divuhit 16 jagi boares biilla, ja dan mii dahkat boahtte vahkkus, muitala son.
Juste sin doaibma
Ábas eaktodáhtolašguovddáža jođiheaddji Brita Triumf lohká sii áinnas sáhttet bidjat ruhtačoaggima divuhan dihte suohkana biilla.
Triumf lohká sii sáhtáše ovdamearkka dihte bidjat johtui lotteriija dákkár biilla nammii.
– Eaktodáhtolašguovddáža bargu leage juste jurddašuvvon ahte galgá suohkanii veahkkin, addit fálaldagaid álbmogii maid suohkan ii leat geatnegahtton fállat.
(Ášši joatká gova vuolábealde)
Jáhkká doarjaga álbmogis
Triumf lohká dat lea seamma gii álggaha ruhtačoaggima, sii vai earát, go oaivvilda ahte dat lea doaibma man Guovdageainnu álbmot doarjjušii, seamma ládje go dorjot servviid lotteriijaid.
Son áigu váldit oktavuođa suohkaniin, ja oaivvilda dat sáhttá jođánit čovdojuvvot.
– Go ii leat nu stuora ruhtasupmis sáhka, de jáhkán vejolažžan čohkket ruđa divuheapmái.
Ášši rievdá go ii gártta gollun
Ávvira jearaldahkii rievdá go ášši jus biilii čoggojuvvo ruhta divuheapmái, de vástida suohkana dearvvašvuođa- ja fuolahusa ovttadatjođiheaddji Kent Ailo Hætta ná:
– Juo, dieđusge de rievdá, go de han ii gártta midjiide gollun. Min bargit sáhtáše de geavahit biilla vuojihit nu movt demensaolbmuid min beaivefálaldagaide, muhto man guhká dat biila manná lea gažaldat man fertet smiehttat, lohká son.
