Beassášlávvordaga galggai Guovdageainnu leansmánni Klemet K. Klemetsen geassit skutervuorbbi man Coop-Extra vuorbádii gávppašeddjiid gaskkas geat leat gávppašan eanet go 500 ruvnno ovddas.
Beassášlávvordaga galggai Guovdageainnu leansmánni Klemet K. Klemetsen geassit skutervuorbbi man Coop-Extra vuorbádii gávppašeddjiid gaskkas geat leat gávppašan eanet go 500 ruvnno ovddas.
Buohkat geat leat gávppašan badjel 500 ruvnno ovddas skábmamánu 26. beaivvi rájes gitta beassášlávvordahkii, leat beassan máksinlihpuin searvat gilvui mas sáhtii vuoitit skutera.
Rámburhoavda Kristin Berntsen jođihii vuorbádeami ovttas guvttiin vihtaniin, ja dasa lassin Guovdageainnu leansmánniin.
Gesii iežas lihpu
Ovdalgihtii ledje buot máksinlihput seaguhuvvon máŋgga geardde. Leansmánni coggalii gieđa sisa dan stuora loaddakássii, burggii gieđain, ja rohttii bajás vuoitolihpu man rámbuvrahoavda oaččui ja rabai dan.
Loattas čuoččui Klemet K. Klemetsena namma, ja vuorbádeaddji lei geassán iežas lihpu ja vuittii ođđa skutera man árvu lea 137 600 ruvnno.
Sihke vuoiti ieš ja rámburhoavda lohkaba áibbas jáhkkemeahttumin ja measta dáhpedorpmi dáhpáhussan.
Árvvoštallá ođđa doaimmaid fas
Kristin Berntsen lea hui duhtavaš dáinna kampánjain man rámbuvra lágidii, mii lea lokten ođđa rámbuvrri dietnasa bures. Son árvvoštallá sullásaš doaimmaid čađahit kundáriidda fas.
35 jagi vuorbádan
Skutervuoiti lohká ahte son ii leat goassege vuoitán ovdal eará go unnibuš vuoittuid. Vaikko lea jo vuorbádan ollu vuoittuid 35 jagis, de son aŋkke hirpmahuvai go Berntsen logai su nama loattas.
