Kárášjoga gielda lea virgádan Annhild R. Nedrejord doaibmi dearvvašvuođa- ja fuolahushoavdan. Son goittot ii leat gearggus kommenteret dearvvašvuođasuorggi dili birra.
Kárášjoga gielda lea virgádan Annhild R. Nedrejord doaibmi dearvvašvuođa- ja fuolahushoavdan. Son goittot ii leat gearggus kommenteret dearvvašvuođasuorggi dili birra.
Ávvir lea čállán soames ášši gieldda dálá ruhtadili birra, mii nuppi kvartálaraporttas čájehii 10,7 miljovnna ruvnnu liigegeavaheami, dahje vuolláibáhcaga.
Ruhtadilli goittot lei buorránan goalmmát kvartála loguid ektui 6,6 miljovnnain ruvnnuin.
Gieldda ruđalaš sevdnjes loguid lassin ovdanbođii raporttas ahte buozalmasvuohta lea lassánan measta goalmmádasain maŋimuš guovtti jagis, erenomážit dearvvašvuođasuorggis.
Stuorámus liigegeavaheapmi
Stuorámus liigegeavaheapmi leage dearvvašvuođasuorggis, badjelaš 3,3 miljovnna ruvnnu, gos lea jo guhkit áigge váilon jođiheaddji ja maiddái lea eanemus buozalmasvuohta.
Gielda virgádii Reidun Boine, gii álggii dán virgái golggotmánu 17. beaivvi, muhto válljii heaitit beaivvát ala, dušše beannot vahkku maŋŋel go lei virgáduvvon.
Su heaitima maŋŋel lea Heidi Boine doaibman hoavdan, gitta mannan vahkku duorastaga rádjái, goas Nedrejord virgáduvvui doaibmi hoavdan.
Ii leat gearggus kommenteret
Son goittot ii leat gearggus vástidit dahje kommenteret gažaldagaid iežas ovddasvástádussuorggis, iige iežas gaskaboddosaš virggi birra maŋŋebárgga.
– Mun lean njealját beaivvi dál barggus, inge háliit kommenteret vuos maidige, dajai son maŋŋebárgga Ávvirii.
