Norgga ráđđehus háliida bidjat johtui nullavišuvnna iešsoardimii. Nullavišuvdna galgá guoskat olles servodahkii.
Norgga iešsoardinlogut eai leat geahppánan. Maŋemus logi jagis leat sullii 600 olbmo Norggas iežas sorbmen juohke jagi. Čakčat ovddida ráđđehus ođđa doaibmaplána movt hehttet iešsorbmema nullavišuvnna bokte. Nullavišuvdna galgá veahkehit ahte iešsorbmenhehttehus vuoruhuvvo eambbo.
– Iešsorbmema ágga lea seagáš ja máŋggadáfot, eatge mii leat nagodan doarvái hehttet iešsorbmema. Nullavišuvnnas mii leat geatnegahtton bargat eanet ja áiggi mielde hehttet ahte olbmot gehččet jápmima dego maŋemus čoavddusin go eallin lea nu lossat, dadjá dearvvašvuođaministtar Bent Høie ráđđehusa neahttasiiddus.
