Kárášjoga dispalávdegotti miellahttu Gunn Anette Anti Aslaksen lea ožžon lobi 2019 rádjái vuodjit skuteriin Rávdojávrriide, muhto seammás leat biehttalan 13 eará ohcamušaid seamma jávrriide.
Kárášjoga dispalávdegotti miellahttu Gunn Anette Anti Aslaksen lea ožžon lobi 2019 rádjái vuodjit skuteriin Rávdojávrriide, muhto seammás leat biehttalan 13 eará ohcamušaid seamma jávrriide.
Kárášjoga sierravuodjinlohpelávdegoddi lea addán sierravuodjinlobi dan golmma Rávdojávrriide iežaset miellahttui Gunn Anette Anti Aslaksenii, gii lea Guovddášbellodaga áirras lávdegottis. Son lea ožžon lobi fievrredit biergasiid guolásteami namas. Sierravuodjinlobis boahtá ovdan ahte vuollái lea čállán dušše lávdegotti áirras Johan Samuel Nedrejord. Seammás čájehuvvo ahte seamma jávrriide seamma sajis leat 13 eará skuhtervuoddji ohcan vuodjinlobi seamma earána dihte, namalassii guolástit.
Buot daid dispaohcamat leat biehttaluvvon maid vuollái leaba čállán Gunn Anette Anti Aslaksen ja Johan Samuel Nedrejord gii lea addán sierravuodjenlobi iežas lávdegotti kollegai.
Caggaba earáid čuoiganláhtu dihte
Soai ákkasteaba hilgumiid dainna ákkain ahte dohko ii sáhte addit sierravuodjinlobi go doppe lea čuoiganláhttu. Dat golbma Rávdojávrri sullii miilla nuortadavábealde Kárášjoga márkana leat ge buorit guollejávrrit gosa eatnasat geat liikojit oaggut olahit čuoigga. Gunn Anette Anti Aslaksen ii áiggo kommenteret maidege go lea bealálaš áššis. Ávvir ii leat ožžon Johan Samuel Nedrejorda ságaide.
Nuppelogis váidán
Dál leat 12 dan 13 skutervuoddjis ovddidan oktasaš váidaga go sidjiide leat biehttalan addimis vuodjinlobiid. Sii čujuhit ge dasa ahte 13 ohcamuša leat hilgojuvvon dan golmma Rávdojávrái. Váidagis čujuhuvvo dasa go sierravuodjenlohpelávdegotti Gunn Anette Anti Aslaksen oktan viđain bearašlahtuin leat ožžon lobi vuodjit Rávdojávrriide.
Váidagis čujuhit lágaide mat dadjet ahte áššit galget meannuduvvot vuoiggalaččat. Sii maiddái čujuhit váidagis go gieldda iežaset kárttain dahje eará kárttaide ii leat merkejuvvon čuoiganláhttu dohko. Sii dáhttot ge ahte sidjiide addojit sierravuodjinlobit seamma eavttuid vuođul dahje dan ahte buot sierravuodjinlobit Rávdojávrriide gessojit ruovttoluotta.
Viehka boastut
Okta dain gii lea vuolláičállán váidaga lea Edvard Johansen.
– Mu mielas lea viehka boastut go sierralobilávdegotti áirras oktan bearrašiin oažžu sierralobi vuodjit Rávdojávrriide ja Ántejávrái muohtaskohteriin, ja jus earát áigot dohko, de šaddet čuoigat. Mu mielas ii leat láhkaulbmil geavahuvvon riekta ja lea issoras váigat ja ártet go áššemeannudeamis čujuhit čuoiganláhttui mii ii gávdno, lohká son.
Bajábeallái fylkkamánni
Johansena mielas lea Kárášjoga gieldda sierralohpelávdegoddi lokten iežaset bajábeallái Finnmárkku Fylkkamánni.
– Go geahččá dan sierralobi man Aslaksen lea ožžon, mii lea njealji jahkái, de sáhttá dan dulkot ahte lea sierralohpi birra jagi, maiddái áigodagas geasset go lea áibbas gielddus vuodjit, lohká son.
Ii oidit ovttage
Johansen lohká sii sávvet ahte váidda váldo vuhtii.
– Álo go olmmoš sádde váidaga, de sávvá ahte boasttuvuođut njulgejuvvojit, muhto dan ii dieđe ovdal go lea bábir gieđas mii muitala dan. Mii oaivvildit ahte buohkat galget meannuduvvot ovtta láhkai, iige oidit ovttage. Buohkat galget oažžut sierralobi, dahje ii oktage, lohká Johansen.
