Nie leat muhtun dajahusat John Máhtte Utsi luođis, «Hoaŋkabealjit», mii lea okta dan moaddelogi luođis mat geassái ilbmet ođđa juoiganskearrus. Geahča video!
Dan rájes go son vuittii Sámi Grand Prix 2004:s, ja go nuppes vuittii 2010:s, de leat Sámis vuordán sus luohteskearru.
Dál lea vuordináigi fargga nohkan, go geassái lea plánas oažžut gárvvisin iežas vuosttaš luohteskearru.
Poehtalaččat dajahallat
John Máhtte Utsi muitala ahte son lea gal guhkit áigge jurddašan luohteskearru almmuhit, muhto ii leat dovdan iežas riekta gearggusin dasa.
– Mun lean dakkár gii galggan nu bures oažžut luođi čuodjat. Jus dan in nagot, de mun barggan vel eambbo dainna, muitala Utsi
Buktá jurdagiid
– Olu mainna lean bargan dál ja masa mun hui bures liikon lea dajahallan. Ii ge dušše dábálaš dajahallan, muhto dakkár dajahallan mii buktá olbmuide jurdagiid, maid guldaleaddjit sáhttet dulkot.
– Mun liikon Mathis A. Oskala dajahallanvuohkái hui bures, muitala Utsi, ja mieđiha ahte Oskal lea okta su juoigi favorihtain
Utsi lea juste ealloravddas go Ávvir suinna hupmá.
Šearbmagovva videos: Linn Margrete Påve
Geassái gárvvis
Utsi muitala iežaska Johan Sara Jr:in, gii buvttada ja almmuhan maid dan CD, bures boahtán johtui luđiiguin.
Soai leaba vuosttaš luođi maid juo almmuhan, mas lea namma «Hoaŋkabealjit», ja dasa leaba video maid ráhkadan.
Dan luođis leat olu dajahusat, juste nu go Utsi ieš muitala áigut dahkat skearrus, ja doppe leat ge dajahusat: «Hoaŋkabealjit go nu čiŋahit, nu čieruhit».
– Mihttu lea geassái geargat, soaitá suoidnemánus ilbmat CD. Das lea jurddašuvvon ahte galget leat birrasii 20 – 25 luođi, muitala son.
– Diet dajahusat «.. .nu čiŋahit, nu čieruhit», maid leat dainna jurddašan?
– Na dien besset de guldaleaddjit ieža dulkot mii sin mielas orru heiveme, lohká son ja boagusta.
Eará guovlluid luđiid
Utsis lea maid ráva juigiide geat leat jurddašeame ovdánit luođi dáfus.
– Mun láven gullat ja geahččalit juoigat eará guovllu luđiid maid. Dainna dovddan ovdánit bures. Dan goit ávžžuhan dahkat juigiid geat beroštit ovdánit.
Lulli sámi luođit
– Sáhtán muitalit ahte mun lean juoigan olu guovlluid luđiid, ja CD:s maid galget gullot Lulli-Sámi luođit. Diehttelasat mun juoiggan daid iežan juoiganmálliin, lohká son, ja lasihastá vel:
– Go dál diláduvvon fas, de fas Mázii báddet eambbo luđiid, lohká Utsi vel loahpas.
