Bivvalis dálki dagaha stuorát uđasvára gaskavahku. Lea ollu muohta várregilggain mat sáhttet luovvanit.
Riddoguovlluide dieđihuvvo bivvalis dálki ja arvi mii stuorida uđasvára. Go ovdal leat geahčadan muohttaga várregilggain, de váruhit dál ahte boares muohta sáhttá fierrat.
Alimus báikkiin vurdet muohttit, ja váruhit garra biekka dihte ahte biegga bossu muohttaga ja čoggo várregilggaide. Stuorimus várra sáhttá leat siseatnamis.
Uđasvárra lea alimus váruhusas mii lea kategoriija 4, dieđiha varsom.no.
Biegga sirddaša muohttaga
Lea sullii 0-10 cm luovosmuohta man biegga bossu várregilggain dál. Váriid alde bosáda muohttaga gilggaide. Erenoamážiid lulli- ja nuorttabealde várregilggain.
Lávvordaga ja sotnabeaivvi vuhttojedje máŋga uđđasa váriin. Sotnabeaivvi fierai muohtauđas Gisteváris Ráirru lahka.
Jáhkkimis ledje skutervuoddjit geat dagahedje uđđasa.
Álttá ja Ráirru guovllus leat iskan muohttaga, ja fuobmán ahte lea seaŋáš skávvaga vuolde, ja de sáhttá muohta luovvanit, dieđihit varsom.no siiddus.
Varsom.no lea neahttasiidu gos dieđihit uđasvára ja eará luondduváruhusaid miehtá Norgga. Neahttasiiddu hovde NVE ovttas Meteorologalaš Instituhtain, Stáda geaidnodoaimmahagain ja Ruovdemáđiidoaimmahagain.
