Bohccot mat vuojahallojit Nordlandsbanenis leat hástalussan elliidčálgui ja lea dávggut boazoeaiggádiidda. Maiddái togabargiide ja Bane NOR bargiide leat dakkár dáhpáhusat hui gáibideaddjin. Bane NOR bargá aktiivvalaččat hehttet dakkár vuojáhallamiid dáhpáhuvvamis, earret eará sierra rutiinnaiguin ja ođđa boazoáiddiiguin.
Bohccot mat vuojahallojit Nordlandsbanenis leat hástalussan elliidčálgui ja lea dávggut boazoeaiggádiidda. Maiddái togabargiide ja Bane NOR bargiide leat dakkár dáhpáhusat hui gáibideaddjin. Bane NOR bargá aktiivvalaččat hehttet dakkár vuojáhallamiid dáhpáhuvvamis, earret eará sierra rutiinnaiguin ja ođđa boazoáiddiiguin.
– Mun vásihan buori gulahallama boazoeaiggádiiguin ja ahte mii ovttasbargat vai hehttet bohccuid vuojáhallot, lohká Bane NOR guovlludirektevra Thor Brækkan.
Lagas gulahallan
Bane NOR galgá čakčamánus ja golggotmánus čoahkkinastit orohagaiguin ja geahčadit rutiinnaid ja doaimmaid, ja oažžut dieđu gos boazodoallit plánejit guođohit bohccuid čakčat ja dálvet.
– Bohccot sáhttet dálkki ja guohtumiid ektui sirdásit, lohká Brækken.
Dan dihte lea dehálaš doalahit lagas gulahallama orohagaiguin ja Bane NOR gaskkas.
Ođđa áiddiid bidjame
25 kilomehtera guhkes guovllus huksejit áiddi gaskkal Mussira ja Kvalfors dál. Áidi lea 7,2 kilomehtera guhku Skog ja Kvalfors gaskkas, lulágeahčen Mussira, ja galgá gárvánit ovdal go dálvá.
Go muohta suddá fas giđđat, de álget áidut Bjorås tunnealla rádjái. Dat luodda lea 25,4 kilomehtera guhkki. Maiddái Holmvassdalenis guhkidit áiddi 2,4 kilomehteriin gaskkal Sefrielv ja Sefrivatn tunneallaid.
Oktiibuot áigu Bane NOR dan boahtte njeallje jagi 44 kilomehtera guhkes boazoáiddi cegget ja bidjá dasa 60 miljovnna ruvnno. Go huksen lea geargan, de leat oktiibuot 63,5 kilomehtera boazoáidi Nordlandsbanenis. Bane NOR árvvoštallá viidáseappot galget go ain hukset eanet boazoáiddiid maŋŋel 2021.
Jotket rutiinnaiguin
Bane NOR joatká mannan dálvvi boazodieđihanrutiinnain ja movt Bane NOR bargit galget gieđahallat ášši jus bohccot vuojahallojit.
Go dieđihuvvo ahte ruovdemáđii lahka leat bohccot, de galgá toga unnidit leahtu dain guovllus ovtta áigge nu ahte lea vejolaš bissehit toga.
Sihke boazoeaiggádat ja togavuoddjit dieđihit.
Dávggut buohkaide
– Dat čuohcá dieđusge maiddái áigemeriide, muhto mii oaidnit dehálašvuođa váldit vuhtii bohccuid. Lea dávggut sihke togavuddjiide, boazoeaiggádiidda ja Bane NOR bargiide go bohccot vuddjojit, ja dan háliidit hehttet nu ollu go lea vejolaš, lohká Bane NOR kunddar- ja johtolatdivišuvnna konseardnadirektevra Bjørn Kristiansen.
Kristiansen lohká maid ahte ii leat vejolaš hehttet ovtta ge ealli vuojahallot ruovdemáđijas, muhto sii barget aktiivvalaččat vai dat lohku njiedjá eanemus lági mielde.
Nordlandsbanen gaskkal Steinkjer ja Bodåddjo lea bajimusas statistihkas mas eanemus eallit vuddjojit ruovdemáđijas.
2014:s ledje 206 bohcco mat jápme ruovdemáđijas. 2017:s ledje 612 bohcco.
Dán rádjái dán jagi leat 307 bohcco vuddjon.
