Johan Anders Bær luođis, «Čalbmeravkaleamis», leamaš badjel 20.000 čájeheami neahtas, muhto buohkat eai soaitte diehtit duogáža luođis.
Johan Anders Bær luođis, «Čalbmeravkaleamis», leamaš badjel 20.000 čájeheami neahtas, muhto buohkat eai soaitte diehtit duogáža luođis.
Luođi lea son earret eará juoigan iežas maŋemus skearrus mas lea namma «Ritni», ja dasa leaba ge ustibiin, Jan Helmer Olsenin, ráhkadan video vel.
Dál dat leat dan badjel 20 000 olbmo geahččan neahtas.
Ráhkadii hávdádussii
Bær ráhkadii luođi 2013:s, maŋŋel go okta olmmái bivddii su juoigat hávdádusas luođi.
Maŋŋel lea luohti báddejuvvon skerrui, ja maid video ráhkaduvvon mii lea hui bivnnut neahtas.
Luođis lea earret eará dajahus «Čalbmeravkaleames don mannet», maid Johan Anders Bær lohká govvidit olbmo eallima.
Juigen gudnejahttima dihte
Johan Anders Bær, ráhkadii áibbas ođđa luođi, go su olmmái háliidii son galgá juoigat ja gudnejahttit olbmá moarserohkki hávdádusas.
– Álggos mun in áigon juoigat gal. Muhto go de bođii dat luohti munnje, de mun mihten gudnejahttit dainna iežan olbmá moarserohkki hávdádusas. «Čalbmeravkaleames» lea luođi namma, ja dat heivii mu mielas hui bures dan oktavuođas juoigat, danin mun maid serven gudnejahttima dihte, muitala dovddus juoigi, Johan Anders Bær.
Beroštii luođis
Nissonrohkki irgi, Honnesváhkilaš Eskil Hovland, dat lei gii bivddii Johan Anders Bær juoigat hávdádusas.
Son muitala ahte su moarserohkki lei luohte berošteaddji, ja su mielas lei luohti hui čáppat gullat.
– Mun jerren Johan Ánttes sáhtášii go son juoigat dan hávdádusas. Son lihkus sáhtii, ja dagai vel hui erenoamáš luođi maid juoiggai. Šattai hui erenoamáš miellaláhki girkus, ja hui čábbát juoiggai, juste nu go mun ledjen jáhkkán, muitala Hovland.
Dán luođi juoiggai Johan Anders Bær hávdádusas (ođasmahte siiddu jus ii iđe dalán):
Jámii nuorran
Hovland moarserohkki jámii hui nuorran, dušše 32 jagi boaris.
Dat čuozai Hovlandii issorasat, ja danin son áiggui ge gudnejahttit iežas moarserohkki, juste nu go orui buot vuohkkaseamos.
– Juhán Ánte juoiggai luođi go gudde moarserohkki gisttu olggos girkus, ja mu mielas juoiggai nu vuohkkasit ja bures, muitala Hovland gii orru ain Honnesvágis.
Ovdal girkus juoigan
Johan Anders Bær, muitala ahte son lea ovdal Ruoŧas juoigan girkus, nu ahte sutnje ii lean ieš girkus juoigat moktege amas.
Son lohká maid leamaš hui vuogas juoigat dan luođi hávdádusas, vaikke dan ii lean ovdal dahkan.
– Mu mielas gal heivešii juoigat vel Guovdageainnu ja Kárášjoga girkus ge, goit gudnejahttima oktavuođas, ja mu mielas gal heivešii vaikke makkár eará oktavuođain maid, lohká son vel loahpas.
Geahča eambbo videoid dappe: www.janhelmerolsen.com
