Kárášjoga Sámi Searvi rávve Kárášjoga vuoigatvuođaid iskat dikkis. – Álggos Meahcceduopmostullui ja diktit dan mannat gitta Alimusriektái jos ii čielgga, dadjá Kárášjoga Sámi Searvvi jođiheaddji, Ragnhild L. Nystad.
FeFo stivrra eanetlohku mearridii 25.11.2020 Finnmárkokommišuvdna konklušuvdnii ahte lea Kárášjoga álbmot geat eaiggáduššet gieldda eatnamiid.
25.01.2021 heaittihii FeFo stivrra eanetlohku sin mearrádusa maid dahke guovtti mánu áigi. Ášši lea sáddejuvvon lobálašvuođadárkkistussii ja gaskaboddosaččat sáhttá rehkenastit ahte FeFo stivra lea čuvvon lága, ja dalle eai šatta rievdadusat, čállá Kárášjoga Sámi Searvi (KSS) preassadieđáhusas.
– Mii leat dál Kárášjoga Sámi Searvvis guorahallan ja gávnnahan ahte lea buoremus rávvet ahte dál váldá Kárášjoga álbmot dan ášši duopmostullui. Álggos Meahcceduopmostullui ja diktit dan mannat gitta Alimusriektái jos ii čielgga, dadjá Kárášjoga Sámi Searvvi jođiheaddji, Ragnhild L. Nystad.
Son dadjá ahte sin mielas galget dál Kárášjoga olbmot ieža dadjat mo ášši galgá čovdot.
– Mii leat dieđusge KSS bealis leamašan mielde dán ášši duvdimin ovddas. Buvttiimet gulaskuddama kommišuvdnii ja FeFoi, muhto dieđus sámi searvi ii leat ieš mii oamasta maidege. Mii háliidat veahkehit olbmuid ahte ožžot dohkkehuvvot ahte Kárášjoga álbmot oamasta Kárášjoga vuođđovuoigatvuođaid, dadjá Ragnhild L. Nystad.
Gielddain ságastallan
– Mii háliidat bargat eará joavkkuin ja mii leat fitnan ságastallamin gielddas, ja mii diehtit sin plána. Sis lei duorastaga ovdagottis čoahkkin ja galge mearridit mo mannet viidáset ja mii áigut doarjut dan, dadjá Ragnhild L. Nystad.
Son lohká áigut ovttasráđiid gielddain bargat ja geahččalit ráhkadit stivrra ja áirrasovddasteaddjeásahusa Kárášjogaopmodahkii ja dan ahte dat ovddidit ášši duopmostuolu ovdii.
– Mii maid doarjut ahte stivra geavaha buriid juristtaid geat máhttet daid áššiid ja dan mii bargat ahte ollašuvvá, dadjá Ragnhild L. Nystad.
Galgá hálddašit iige oamastit
– Mu mielas orru vuolidan dán ášši ja bidjan hálddašhusáššin. Ii leat dattetge dat mii lea dat váldoášši, muhto oamasteapmi, gii oamasta Kárášjoga vuođđovuoigatvuođaid, dadjá Ragnhild L. Nystad.
Nystad muitala ahte leat hállan guhkes áiggi vuoigatvuođaid birra, gii oamasta opmodaga, galgá go stáhta oamastit vai gii.
– Mii eat leat goassege dohkkehan dan ahte mahkáš FeFo galgá oamastit, dat galggai hálddašit ii ge oamastit, dadjá Ragnhild L. Nystad.
Áigemearri loktet ášši Meahcceduopmostullui lea geassemánu 11. beaivvi 2021.
Guovttebeallásaš ášši
Várresátnejođiheaddji John Nystad muitala ahte áššis leat guokte beali, nubbi lea Norgga stáhta ja nubbi lea Kárášjoga álbmot.
– Nu mo ášši jorran maŋimuš jahkebeali, de lea Finnmárkkuopmodat dadjan ahte sii eai doarjjo eaige daga šat maidege áššiin, dadjá várresátnejođiheaddji John Nystad.
Son lohká iežaset doarjut ollislaččat kommišuvnna barggu ja njealját guovllu konklušuvnna, namalassii Kárášjoga. Dat lea sin dokumeanta viidásat bargguin áššiin, ja dokumeanttas ovdan bohtet áššedieđut mat leat leamašan vuođđun Finnmárkkukommišuvnna eanetlogu vuođuštemiin ja konklušuvnnas.
– Dan maid ferte muitit lea ahte Norgga stáhta han nammadii ja bijai johtui Finnmárkkukommišuvnna, čielggadan dihtii justa vuoigatvuođaáššiid, dadjá John Nystad.
Son lohká ahte nu guhká go ášši lea dán guoktá gaskka, de šaddá Meahcceduopmostuolus dat gažaldat mii ferte čielggaduvvot, ahte mii raporttas boahtá ovdan ja maid Finnmárkkukommišuvnna eanetlohku lea cealkán.
– Mii čielggaduvvot de ferte lea goappáin Meahcceduopmostuollu lea ovttaoaivilis, kommišuvnna eanet- vai unnitloguin? dadjá John Nystad.
Earát čuvvot ášši
– Olugat hállet guđe láhkai dat galgá hálddašuvvot, muhto ii oba leatge dan dásis ge dat ášši. Njulgestaga danin go ii leat čielggaduvvon oamastangažaldat. Áidna vuohki ahte dát ášši čielga, lea Meahcceduopmostuolu ovdii dan geassit, muitala John Nystad.
Son ii loga gávdnot eará vejolašvuođa gos dan sáhtášii čielggadit.
– Norgga stáhta han lea ieš bidjan Finnmárkkukommišuvnna johtui njulgestaga dan dihtii go áiggiid čađa lea leamašan dat gažaldat nu garas sámi guovlluin, dadjá John Nystad.
Son muittuha ahte vuoigatvuođaášši eatnamiidda ja čáziide, gos dat vulggii ja maid stáhta gomihii, muhto diplomatiija bođii sisa ja bijai Finnmárkkukommišuvnna doibmii. Njulgestaga čielggadeami dihtii makkár vuoigatvuođat leat sámi guovlluin daidda eatnamiidda mat ovdamearkka dihtii Kárášjogas leat.
– Eará gielddat dáidet čuovvut dán ášši nannosit, guđe láhkai mii Kárášjogas bargat viidáset áššiin, danin go doppe leat eará gielddat mat nu mo mun ádden leat divvon dahje leat divvumin gáibádusa kommišuvnna ovdii, dadjá John Nystad.
Son muitala ahte buot deháleamos dán oktavuođas leat geavahanvuoigatvuođat. Sis geain leat geavahanvuoigatvuođat dál eai rivvejuvvo go leat vuoigatvuođat mat lágalaččat leat biddjon.
