Háliidit Viessobáŋkku veahkkin nuorra boazodolliide.
Preassadieđáhusa dieđuid mielde oaivvilda Per Mathis Oskal (Bargiidbellodat) ahte nuorra boazodolliin lea hástalus beassat huksegoahtit. Dan čatná Oskal unnán dietnasii vuosttaš doaibmajagiid, juoga mii dagaha váttisin oažžut loana dárbbašlaš huksemii, nu go viesu ja guođohanbartta.
– Ii leat mihkke čiegusvuođaid ahte nuorra boazoeaiggádiin lea unnán dienas, earenoamážit álggahanmuttus. Lea stuora investeremiin sáhka, ja máŋggas bággehallat vuoruhit eret alcces viesu guhkes áigái, dadjá Oskal.
Oskal sávvá ahte Sámediggi galgá boazodoallošiehtadusa bokte sáddet signálaid ahte dat lea juoga maid eiseválddit fertejit geahčadit.
– Oaivvildit ahte Viessobáŋku ferte álggahit ortnega boazoealáhussii, mas fállet viessobáŋkoloana maiddái nuorra álggaheddjiide. De jáhkán livččii mihá buoret sidjiide geat min maŋis galget boazodoalus bargat, muitala Oskal.
