Sámeálbmot Bellodaga (SáB) ságadoalleevttohas Bjarne Store-Jakobsen oaivvilda Unjárgga gieldda fertet farggamusat šiehtadallat Stuorravuona internáhta eaiggádiguin ásahit heahteruovttu Syria báhtareddjiide.
Sámeálbmot Bellodaga (SáB) ságadoalleevttohas Bjarne Store-Jakobsen oaivvilda Unjárgga gieldda fertet farggamusat šiehtadallat Stuorravuona internáhta eaiggádiguin ásahit heahteruovttu Syria báhtareddjiide.
Sámeálbmot Bellodaga ságadoallievttohas lohká sin gieldda galgat čájehit solidaritehta ja ovddasvástádusa olbmuide geat leat heađis.
-Soađeáigge besse Unjárgga gieldda olbmot dorvobákkiide miehtá Norgga go ledje heahtedilis. Dan eat galgga vajáldahttit, lohká Store-Jakobsen.
Mielas dorvoruktui
SáB/SfP lei čoahkkimis bearjadaga internáhta eaiggádiiguin, mas čielggai ahte sii leat mielas geavahit ovddeš internáhta lanjaid dorvoruoktun.
-Stivrrajođiheaddji Alf Bjørn Nilsen lohká sii sáhttet váldit vuostá sihke bearrašiid ja ovttaskas olbmuid, áinnas beallešaddi nuoraid. Fitnodagas leat sihke stuorra ásodagat bearrašiidda ja lanjat mat heivejit ovttaskas olbmuide, lohká Store-Jakobsen.
Čájehit váibmoláđisvuođa
SáB/SfP mielas dorvoruoktu šattašii buohkaide ávkin. Jos fállá bargohárjáneami, giellaoahpahusa, dáidda- ja kulturdoaimmaid ja muđui ráhkada oadjebas árgabeaivvi báhtareddjiide, dahka dát buori sihke olbmuide ja servvodahkii.
-Nie mii ásahat ođđa bargosajiid, servvodat ealáska ja nu šaddá sihke ekonomalaččat, olmmošlaččat ja sosiálalaččat ávkin buohkaide. Unjárgga gieldda beaggin ovdána, min servvodat čájeha váibmoláđisvuođa, rabasvuođa ja ustitvuođa mii geasuha eambbo olbmuid gildii. Ássanmiella badjána ja nu lea dat ávkin midjiide buohkaide, lohká Store-Jakobsen.
