– Guovllu berrešii ráfáidahttit máŋggaid jagiid

Mannodaga dieđihii Eanandoallo- ja biebmodepartemeanta ahte sii dorjot ávžžuhusa heakkahuhttit gottiid vuosttaš sonas Nordfjella guovllus.

– Daid ovttačilggolaš fágalaš rávvagiid, maid lean ožžon Biebmobearráigeahčus, Veterinearainstituhtas ja oadjebasbiepmu dieđalávdegottis, de lean mearridan doarjut ahte Nordfjella gottiid oažžu jávkadit, muitalii eanandoallo- ja biebmoministtar Jon Georg Dale preassadieđáhusas.

Ráfáiduhttit guovllu

NBR nubbijođiheaddji, Per John Anti, doarju departemeantta mearrádusa ja lohká NRK Sápmái ahte dát lea ilgadis dávda, man birra ii dieđe vuos nu ollu.

Vaikko son ii leat sihkar ahte bohccuide ii leat njommon dávda, de sáhttá mearrádus aŋkke hehttet njoammudávdda leavvamis.

– Guovllu berrešii ráfáidahttit máŋggaid jagiid ovdal go ásaha ođđa čeardda dan guvlui, vai lea sihkar ahte dávda jávká oalát, lohká Anti NRK Sápmái.