-Almmuhus-
-Almmuhus-

OAIVILAT

Dát lea oaivilčálus, cealkámuš, kommentára dahje kronihkka maid ekstearna čálli lea čállán. Čállosis ovddiduvvojit čálli oainnut, guottut ja oaivilat. 

Guovda­geainnu Sámilistu oaivvilda ahte mohtorjohtolat­prošeakta ferte dál álgga­huvvot

-

-

– Sámediggi lea jo máŋga jagi áigi juolludan ruđa Guovdageainnu suohkanii álggahit geahččalanprošeavtta – mohtorjohtolat meahcis. Dađibahábut eai leat sii geat leat stivren suohkana maŋimuš njeallje jagi bidjan johtui prošeavtta, čállá Guovdageainnu Sámilistu 5. evttohas Maren Benedicte Nystad Storslett dán kronihkas. 

Sámediggi lea jo máŋga jagi áigi juolludan ruđa Guovdageainnu suohkanii álggahit geahččalanprošeavtta – mohtorjohtolat meahcis. Prošeakta galggai guorahallat vejolašvuođaid heivehit mohtorjohtolatnjuolggadusaid vai buorebut vuhtiiváldet ja sihkkarastet árbevirolaš sámi meahcásteami ja luonddu ávkkástallama. Vásáhusat ja bohtosat prošeavttas galge leat vuođđun máhcahagaide mohtorjohtolatlávdegoddái, geat galget ovddidit rievdadusaid otná mohtorjohtolatláhkii.

Dađibahábut eai leat sii geat leat stivren suohkana maŋimuš njeallje jagi bidjan johtui prošeavtta. Suohkan ii leat váldán vuostá ruđaid, ja prošeakta ii leat ovdánan. Ávvira-debáhtas duorastaga beasaimet gullat ahte Sámediggi lea máŋgii sádden muittuhusa suohkanii, ja ávžžuhan váldit vuostá ruđaid ja álggahit prošeavtta. Dađibahábut dat ii leat čuovvuluvvon suohkana bealis, vaikko meahccegeavaheapmi lei okta válgagižžoáššiin 2019 válggain.

Guovdageainnu sámilisttu preassagovva
Guovdageainnu sámilisttu preassagovva

Guovdageainnu Sámilistu oaivvilda ahte meahcásteapmi lea dehálaš min birgejupmái, ja danne mii oaivvildit ahte prošeakta ferte álggahuvvot nu jođánit go vejolaš. Árbevirolaš ávkkástallan ja lagasvuohta lundui lea rievdan áiggiid mielde, dan oaidnit maiddái johtolagas. Árgabeaivvis eará bargguin, skuvllain ja bearrašeallimin sáhttá mohtorfievru leat dehálaš veahkkeneavvu vái árbevirolaš guovllut leat olámuttus.

Máhttu luonddu ja meahcceresurssaid birra lea fuolahuvvon ja fievrriduvvon viidáseappot johtaleami ja ávkkástallama bokte. Mii dárbbašit mohtorjohtolatlága mii goziha sámi árbevirolaš meahcásteami ja luonddu ákkastallama. Geahččalanprošeakta Guovdageainnu suohkanis sáhtašii buktit dehálaš vásáhusaid mot heivehit lágaid báikkálaš geavaheapmái gos sámi árbevierut ja rievttit leat suodjaluvvon, seammás go ealáhusat ja luondu vuhtiiváldo.

Mii Guovdageainnu Sámelistu eat áiggo friddjavuodjima. Mohtorjohtolat galggašii ain regulerejuvvot vai vuodjin mii billista ja muosehuhttá ráddjejuvvo. Muhto njuolggadusat fertejit rievdaduvvot nu ahte dat fuolaha sámi ávkkástallanvieruid ja sihkkarastá eanet báikkálaš heiveheami ja hálddašeami.

-Almmuhus-