Guovdageainnu dievdduin eahpesihkkaris boahtteáigi

Dál, go measta buot ráidočiekčamat leat čikčon, de čájehuvvo ahte Guovdageaidnu ja Indrefjord bissot 11. ja 12. sajis.

Dat mearkkaša ahte nidjet 5. divišuvdnii.

– Ovdal lea leamaš kvalifiserenčiekčan dan guovtti ossodatvuoiti gaskka 5. divišuvnnas, mas vuoiti beassá 4. divišuvdnii. Dan ođđa ráidovuogádagas áigot nu unnán rátkkačiekčamiid go vejolaš. Dat mearkkaša ahte Báhcavuotna, mii vuittii nuorttabeale 5. divišuvnna, ja Fálesnuorri mii vuittii oarjjabealde, galggašii 4. divišuvdnii, ja Guovdageaidnu ja Indrefjord fas 5. divišuvdnii. Muhto ii leat daddjon ahte buohkain lea hállu čiekčat alit dásis, man mii diehttelasat váldit vuhtii. Jus Fálesnuorri ii áiggo, de beassá Guovdageaidnu joatkit 4. divišuvnnas. Jus Báhcavuotna ii ge áiggo, de beassá Indrefjord maid joatkit, čilge Finnmárkku spábbačiekčanbiirre Rune Haugseth Altapostenii.

Alit dássái

Sotnabeaivvi ledje áigodaga maŋemus 5. divišuvdnačiekčamat Oarje-Finnmárkkus.

Fállejoga nuppi joavkkus ledje arvat eambbo čuoggát go Álttá goalmmat joavkkus, mii dagahii ahte Fállejohka 2 vuittii, Alta 3 fas nubbin.

Dasto BUL 2, Porsanger 2 ja HFK/HIF/Stein. Fálesnuorri šattai guđat sadjái 13 čuoggáin 14 čiekčamis, ja sis ledje dušše Indrefjord 2 ja Billávuotna vel maŋŋelis.

Muhto dat lea doarvai ahte Fálesnuorri beassá 4. divišuvdnii jus dan hálidit.

– Álttá nubbi joavku (Alta 2) ii beasa joatkit Norsk Tipping-ligas, ja čikčet danne 4. divišuvnnas boahtte áigodaga. Dat mearkkaša ahte Alta 3 ferte bissut seamma dásis. Dain eará joavkkuin leat iežaset vuosttaš joavkkut ain 4. divišuvnnas, ja danne sii maid bissot 5. divišuvnnas. Danne lea Fálesnuoris dat vejolašvuohta beassat 4. divišuvdnii, dadjá Haugseth.

Ii leat vel čielgan

Biire galgá dál gulaskuddat servviiguin.

– Mii eat leat vel čielggadan goassážii dát galgá čielgan, muhto doaivut ahte galgat geargan skábmamánu gaskkamuddui. Searvvit galget oažžut jurddašanáiggi, loahpaha Haugseth.