Guovdageaidnulaččat bidjet badjel 4 miljovnna ruvnno ruhtaspealuide ja leat maid olmmošlogu ektui bajimusas listtus geat eanemusat spellet ruhtaspealuid.
Guovdageaidnulaččat bidjet badjel 4 miljovnna ruvnno ruhtaspealuide ja leat maid olmmošlogu ektui bajimusas listtus geat eanemusat spellet ruhtaspealuid.
Guovdageaidnu lea bajimusas Norsk Tipping speallamis, ja čájehuvvo ahte juohke suohkanássi nammii spelle 1 792 ruvnno ovddas Vikinglotto diibmá. Unjárga lea nubbin listtus. Vaikko Unjárga lea máŋggaid jagiid leamaš bajimusas dán listtus, de eai leat Unjárggas goassege vuoitán stuorimus vuoittu Vikinglottos. Unjárggas spelle 1687 ruvnno ovddas juohke ássi nammii.
Vikinglotto vuoitit
Guovdageainnus leat guovttis vuoitán Vikinglottos ja goappašat vuoitit leaba nissonolbmot. Jagi 2006 vuittii okta nisu 4,5 miljovnna, ja diibmá vuittii nubbi nisu 2,9 miljovnna ruvnno. Son ii leat áidna guovdageaidnulaš gii lea ožžon miljovdnavuoittu iežas kontui maŋemuš 12 mánus.
Vihtta ođđa miljoneara maŋemus 12 mánus
Gilli, mas leat sullii 3000 ássi, lea jo vuoitán vihtta miljovdnavuoittu diimmá ođđajagemánu rájes. Guovdageainnu sátnejođiheaddji Johan Vasara jurddaša ollugat speallagohtet go muhtimat vuitet.
– Ii leat nu čiegus jus leat speallanmilliuneara Guovdageainnus, ja go ránnjá dahje oahpes olmmoš vuoitá, de viimmáskit earát maid speallat, oaivvilda sátnejođiheaddji.
Ođđa Verdal
Maŋemus viđa mánus leat njeallje stuora vuoittu mannan Guovdageidnui. Okta dievdu vuittii miljovnna ruvnno Nabolaget spealus čakčamánus. Skábmamánus vuittii okta dievdu 7,2 miljovnna ruvnno Lottos, ja juovlamánus faskkui muhtin dievdu Flax-vuorbbi ja vuittii miljovnna. Maŋemus miljovdnavuoitu bođii easkabáliid, loahpas ođđajagemánu dán jagi.
– Mii leat ođđa Verdal, boagusta Vasara gii maid lea álgán speallat, čállá Norsk Tipping Nordlys siiddus. (Dien siiddus beasat maid iskat man ollu juohke suohkanis Norggas spellet).
