-Almmuhus-
-Almmuhus-
OĐĐASAT- Guolástannjuolggadusaid mearridedje báikkálaš mearkkašumiid haga

– Guolástannjuolggadusaid mearridedje báikkálaš mearkkašumiid haga

-

-

Ná oaivvildit Murmánskka regionála ođastuvvon guolástannjuolggadusaid birra.  Dáid mielde sámiin lei váldon eret riekti fierbmut nu mo ovdal.

Ávvir lei jo čállán dan birra ahte ollu sámit Guoládatnjárggas bállet massimis guolásteami. Dalle ge Murmánskka guovllu dahje oblast sátnejođiheaddji dáhtui regionála eisseválddiid gulaskuddat ášši.

 

Ođđajagimánu loahpas dát ledje doallan čoahkkima mii ii lean plánejuvvon ággán lei gulaskuddat ja geahččalit gávdnat čovdosiid áššis.

– Dakkaviđe go mii leat ožžon árvalus ođastit guolástannjuolggadusaid, de mii leat deattuhan, ahte dán barggu ii sáhttá čađahit álgoálbmogiid haga, geaidda dát guoská eanemustá, namalassii sápmelaččaid haga, čilge dili Murmánskka regionála eisseválddiid bealis Andrey Alekseev Arctic TV- stašuvdnii.

Eisseválddi sániid mielde sii eai dorjon dakkár ođasteami ja dát ođđa guolástannjuolggadusat ledje dohkkehuvvon Moskvas báikkálaš mearkkašumiid haga.

– Mis lea álgu rájes dakkár oaidnu ahte áššis galget gullet buot bealit, lohká eisseváldi.

 

Rievdadit guolástannjuolggadusaid lea vejolaš

Regionála eisseválddit evttohedje čoahkkimis mii lei ođđajagimánu 29. beaivvi álggahit barggu rievdademiid hárrái dainna lágiin ahte Guoládatnjárggas lea fas lohpi sápmelaččaide fierbmut nu mo ovdal. Muhto dat proseassa sáhttá ádjanit.

 

Otná beaivvi mielde sámiin leat guolleearit, namalassii 300 tonna dorski ja 75 tonna juvssu. Muhto ođastuvvon guolástannjuolggadusat lea váldon eret riekti earret eará fierbmut.

– Earit leat báhcán, muhto dat go mearas ii leat šat lohpi firpmiiguin bivdit, de dat iešalddis mielddisbuktá dan ahte oaggunstávrráin mearrafatnasis lea veadjemeahttun goddit tonna dahje moadde tonna kilo guliid ovdamearkka dihte maid de sámit maŋŋá galggaše juogadit. Maiddái jus searvi, joavku dahje olmmoš ii nagot goddit dán mearriduvvon eari sturrodaga, de dat mielddisbuktá dan ahte boahtte jahkái oažžu unnit eari, čilgii Ávvirii Andrey Danilov, Sámirađi Ruošša juhkosa jođiheaddji ođđajagimánu 26. beaivvi.

 

 

-Almmuhus-