Alf Isak Keskitalo oažžu dán jagáš RiddoDuottarMuseaid gudnebálkkašumi, earret eará ánssaša dan su guhkesáigásaš barggu geažil museabargin.
Alf Isak Keskitalo oažžu dán jagáš RiddoDuottarMuseaid gudnebálkkašumi, earret eará ánssaša dan su guhkesáigásaš barggu geažil museabargin.
RiddoDuottarMuseaid bargiid evttohedje ahte Alf Isak Keskitalo galgá oažžut gudnebálkkašumi, ja dan vuođul mearridii stivra ovttajienalaččat stivračoahkkimis mii dollui njukčamánu ahte Keskitalo ánssaša gudnebálkkašumi. Dan dieđiha RDM preassadieđáhusas.
Stivrajođiheaddji Johan Ailo Kalstad dadjá ahte sidjiide lea hui somá go dán háve besset juste Alf Issáha gudnejahttit, go son lea iežas fágalaš čehppodagain, nanu sámi kulturmáhtuin ja vuogas olmmošlaš attáldagaiguin leamaš hui guovddážis hukseme min vuosttaš sámi ásahusaid.
RiddoDuottarMusea čállá ahte Alf Issát ánssáša gudni su guhkesáigásaš barggu geažil museabargin, konserváhtorin ja jođiheaddjin, sihke Sámiid Vuorká-Dávviriin ja Guovdageainnu gilišiljus.
Son lea maid atnán sámegiela, árbevieruid ja kultuvrra vuođđun sámi institušuvnnaid ceggemis.
Vuosttaš sápmelaš
Keskitalo lea vuosttaš sápmelaš gii válddii alit oahpu filosofiijas, ja lei maid mielde hukseme sámi dutkama Sámi Instituhtas ja sámi museain.
Dasa lassin lea son vel almmuhan birrasii 50 fágaartihkkala ja čállán Guovdageainnu suohkana suohkangirjji.
Gudnebálkkašupmi lea 7500 ruvdnosaš mátkkoštanstipeanda ja diploma, man dáiddár Máret Ánne Sara lea hábmen.
RiddoDuottarMuseaid gudnebálkkašupmi geigejuvvo mánnodaga geassemánu 25. beaivvi. Doalut leat Guovdageainnu Gilišiljus dii.15:30-18:00.
