Bajásšattadettiin son beroštišgođii govvemis. Erenoamáš čehppodagain son dál darveha bottožiid, hámiid ja čuovgga kámerainis.
Bajásšattadettiin son beroštišgođii govvemis. Erenoamáš čehppodagain son dál darveha bottožiid, hámiid ja čuovgga kámerainis.
RiddoDuottarMuseat-Sámi Dáiddamagasiidna Kárášjogas háliidit ovdanbuktit Kárášjoga govvejeaddji Liv Engholma govvačájáhusa.
Liv Engholma govat deaivvadit gaskal luonddu-, dáidda ja dokumentáragovvema. Earenomáš čehppodagain son darveha bottožiid, hámiid ja čuovgga kámerainis, čállá RDM.
Liv Engholm lea bajásšaddan luonddu ja Kárášjoga kultuvrra lahka. Bajásšattadettiin son beroštišgođii govvemis. Beaivválaččat bargá son ofelažžan, eanaš guhkit dálvemátkkiin. Sus lea álohii kámera fárus, leaš dal guhkit vai oanehat mátki.
– Son govve luonddugovaid maidda darveha luonddu bottožiid. Go dokumentere elliid ja olbmuid luonddu hálddus, de govat ovdanbuktet vuoibmás ilu ja dan movtta mii olbmos lea go vánddarda luonddus, boahtá ovdan preassadieđahusas.
Čájáhusrahpan
Engholm lea iežas ovdánahttán govvejeaddjin go lea olu govven, fágalaččat gealbudan ja ođasmahttán iežas oahpuin, ja go lea bidjan návccaid iežas govvensearvái.
Son lea maid belohahkii profešonaliseren govvendáiddus go ieš lea oahpahan earáid govvet, dokumentašuvdna govvemiin bargan museaide ja ásahusaide ja muđui govven iešguđetge dilálašvuođain.
Liv Engholm lea maid vuovdán govaid čikŋan ruovttuide, mediaide, áigečállosiidda ja aviissaide. Su áŋgiruššan ja dáiddalaš attáldagat oidnojit čielgasepmosit go govve olbmuid, elliid ja luonddu.
Dál bovde Sámi Dáiddamagasiidna čájáhusrahpamii sotnabeaivvi njukčamánu 4. beaivvi. Čájáhus lea Kárášjogas, Sámiid Vuorká-Dávviriid museas áigodagas njukčamánu 4. beaivvi rájes geassemánu 1. beaivvi rádjái.
Čájáhusa rahpá čájáhusa kuráhtor Gry Fors.
