Gottii stuorraluosaid.
Gottii stuorraluosaid.
Gonagas Harald finai dán jagi maid iežas jahkásaš luossabivddus Álttás, čállá Altaposten.
Alta laksefiskeri interessentskap attii Gonagassii guokte liigejándora oaggumii go Gonagasas devddii 80 jagi guovvamánus, nu ahte dán jagi beasai oaggut njeallje jándora Álttájogas.
Gottii guokte luosa
Gonagasa mielas lei dán jagi hui ráfálaš, dál ii lean nu hušša go ovddit jagiid.
Gonagas gottii ieš guokte stuorraluosa dolgevuokkain.
Oktiibuot gotti Gonagasa joavku ovcci goadjima ja logi ditti, muhto válde dušše golbma goadjima ja moadde ditti, muđui luite eará guliid etnui.
Beasahii stuorraluosa
Gonagas Harald beasahii maid stuorraluosa.
Gonagasa suhkki oinnii dušše hirbmat beahceha go luossa beasai luovus.
Suhkki einnostii luosa leat badjelaš 20 kilo lossadin.
