Politiijat leat váldán gitta ja áššáiduhttán golbma olbmo goddimis dahje searvamis goddimii.
Maŋimuš áican viđátlotjahkásaš Stian Holes lei Stuorgiettis, Hápmira suohkanis geassemánu 7. beaivvi 2023:s. Guovtti beaivvi maŋŋel dieđihuvvui son láhppon.
Dan rájes leat politiijat guorran Hole ja dutkan mii suinna sáhttá leat dáhpáhuvvan. Mannan geasi áššáiduhtte ovtta olbmo goddán dahje searvan goddit Hole. Nuppi ges áššáiduhtte gielistan gažadeamis.
Maŋŋebárgga válde politiijat gitta dan guovtto ja vel goalmmát olbmo.
– Mii leat váldán gitta ja áššáiduhttán golbma olbmo goddimis dahje searvamis goddimii. Okta dain leamaš áššáiduhtton geasi rájes ja nubbi ges leamaš áššáiduhtton gielistan gažadeamis, lohká Nordlándda politiijaguovllu politiijaadvokáhtta Torje Imøy preassadieđáhusas.
Háldogiddagassii
Politiijat leat ain dutkamin mii dáhpáhuvai Stian Holein ja danin eai sáhte muitalit eará go ahte dutkan lea vuođđun gittaváldimii ja áššáiduhttimii. Politiijat gáibidit buot golbmasa háldogiddagassii.
– Dat lea duođalaš ášši mas politiijat leat čađahan vuđolaš guorrama seammás go leat dutkan lea go ráŋggáštahtti dahku duogážin jávkamii. Obbalaš dutkan lea vuođđun gittaváldimii ja áššáiduhttimii, ja politiijat gáibidit buot golbmasa háldogiddagassii, lohká Imøy.
