Anne Marie Therese Eira Kemi ja Máhtte Niillas Gaup leaba meaštárat njoarosteamis, soai vuittiiga gollegieđa njoarostangilvvuid Márjjábeivviin.
Anne Marie Therese Eira Kemi ja Máhtte Niillas Gaup leaba meaštárat njoarosteamis, soai vuittiiga gollegieđa njoarostangilvvuid Márjjábeivviin.
Sihke nisson- ja dievdoluohká vuoitit gullaba Guovdageainnu suohkanii, guovdageaidnulaš Anne Marie Therese Eira Kemi ja mázelaš Máhtte Niillas Gaup vuittiiga goabbái ge 500 euro go njoarosteigga buoremusat Márjjábeivviid njoarostangilvvus Eanodagas.
Eai geasuhan dattege eanet gilvaleddjiid
Márjjábeivviid lágideaddjit rievdadedje ja ođasmahtte njoarostangilvvuid dán jagi vai geasuhivčče eambbo ja ođđa oasseváldiid, dasa lassin lasihedje vuoittuid.
– Dievdoluohkás ledje 16 njoarosteaddji ja nissonluohkás ges čieža. Mun jáhkkán ahte dán jagi leamaš sullii seamma olu oasálastit go ovdal, lohká lágideaddji Elen-Anne Sara.
Oahppan mo vel buoredit
Vaikke njoarostangilvvut eai geasuhan eanet gilvaleddjiid, lea lihkostuvve goit njoarostallamat bures. Dán jagi ledje lágideaddjit ođasmahttán njoarostallama, oasseváldit galge njoarostit stoalppuid mat lihkadit dego bohccot.
– Manai hui bures ja mii lihkostuvaimet. Dál leat ožžon olu jurdagiid mo vel sáhttá rievdadit ja buoredit gilvvu boahtte jahkái. Olbmot liikojedje ođđa gilvvuid, lohká Sara.
Muđui mannan bures
Odne lágiduvvojit njoarostangilvvut mánáid ja nuoraid várás, dasa lassin vudjet heargegilvvuid finála ovdal Márjjábeaivvit loahpahuvvojit. Lágideaddji lea duhtavaš doaluiguin dán rádjai.
– Lea mannan áibbas bures. Mis eai leat vel dárkilis logut, muhto eahketdoalut leamaš bivnnuhat. Olu nuorra olbmot leamaš dáppe. Heargegilvvuide leat maid boahtán olu geahččit, ja nu go dábálaččat de leat maiddái turisttat dáppe, loahpaha Sara.
