Boahtte bearjadaga, suoidnemánu 8. beaivvi, almmuhit Buolbmágis Deanus luohte-skearru mas beassat gullat golmma buolvva luđiid oktanis. – Viimmat mii leat ovttas juoidá ráhkadan, muitala Anne Lise Varsi.
Boahtte bearjadaga, suoidnemánu 8. beaivvi, almmuhit Buolbmágis Deanus luohte-skearru mas beassat gullat golmma buolvva luđiid oktanis. – Viimmat mii leat ovttas juoidá ráhkadan, muitala Anne Lise Varsi.
CD-skearru namma lea «Golbma buolvva» ja mielde leat Márgget Varsi (áhkku), Anne Lise Varsi (eadni) ja Ida Márjá Varsi Solbakk (nieida).
ČálliidLágádus lea buvttadan dan CD-skearru.
– Mii gulasteimmet sin juoigamin. Mii beare fertiimet ráhkadit CD vai eambbosat besset guldalit Deanuleagi čábbámus luđiid, čállá lágádus preassadieđáhusastis.
CD-skearrus leat Čorgašnjárgga ja Deanu árbevirolaš luođit, ja lassin vel ođđa luođit. Boarráseamos luohti navdo leat birrasii 1850-logus.
– Eanaš luđiide leat bidjan instrumeanttaid, ja nu dás árbevirolaš luohti ovttas čuojanasaiguin loktana ođđa váriide, govvidit CD-skearru.
– Eat go mii ráhkat CD?
Anne Lise Varsi muitala sin agibeaivvi juoiggadan ja luohti lea oassin sin eallimis.
– Go mun ledjen mánná, de moai etniin láviime juoigat, ja mu nieida álggii maid juoigat.
Márgget Varsi (75), guhte lea sihke áhkku ja eadni, dat fuomášii ráhkadit CD-skearru.
Govven: Amund Johnskareng/ČálliidLágádus.
– Eadni lohká oktii: «Eat go mii ráhkat CD!» Lea eadni gii háliidii ráhkadit CD vai sus báhcet muittut, muitala Anne Lise Varsi.
Varsi muitala sii báddegohte juoigama ruovttus mannan geasi, Deanus. Muhto ii leat nu álkes bargu báddet go juiget oktanaga. «Golbma buolvva» lea vuosttaš CD-skearru man almmuhit.
– Viimmat mii leat ovttas juoidá ráhkadan
ČálliidLágádusas einnostit buori boahtteáiggi CD-skerrui man leat almmuhan.
– Mii gal eat eahpit, dáinna CD:in golbma buolvva dahket alcceseaset saji máilmmi musihkkii.
Ieža juoigalasat, Márgget Varsi, Anne Lise Varsi ja Ida Márjá Varsi Solbakk, leat vuos ráhkkaneame vuosttaš CD-skearru almmuheapmái sin eallimis.
Dat galgá leat Buolbmágis ja illudit dasa makkár hápmái šattai CD-skearru.
– Go mii leimmet guldaleame, de gatnjalat bohte sihke mus, eatnis ja nieiddas. Ahte de viimmat mii leat ovttas juoidá ráhkadan. Min niehku lea maid ollašuvvan dál, muitala Anne Lise Varsi.
– Livččii hui somá mátkái vuolgit
Juste dál juoigit ráhkkanit sin vuosttaš stuorra musihkkadáhpáhussii, iežaset CD-skearru almmuheapmái. Hárjehallet ovttas sin musihkkariiguin.
– Mii leat ordnen čuojaheddjiid, hárjehallan daiguin ovttas jo veahá. Lea hui gelddolaš oaidnit man ollu olbmot bohtet.
Ávvir ges lea sáhkkii juoiganmátkki birra.
– Makkár plánat leat dan ektui?
– Livččii hui somá vuolgit mátkái, muhto dat lea áigi mii veahá bisseha. Ida Márjá, mu nieida, lea oahpu gazzamin máddin, ja lea dáppe beare oanehis áiggi. Nu ahte mun in dieđe movt mii galggašeimmet dan nagodit gal, muhto dieđusge livččii hui somá duohko, deike sámeguovllus juoiganmátkái dollet.
CD-skearru almmuhit boahtte bearjadaga, suoidnemánu 8. beaivvi diibmu 20:00, lávddi alde Musea luhtte Buolbmágis.
