Justa ovdalaš vuolgga, lea nuoramus sihkkelasti deatnulaš Henrik Arntzen Joks (17) gealdagasas, gii gilvala ovttas iežas áhčiin Stein Joksain. Maiddái su oabbá Martine Joks searvá nissoniid luohkkái.
Deatnulaš Henrik Arntzen Joks áhčči Stein Joks, (Sirma IL) muitala su gándda ožžon sierralobi gilvalit Offroadas, go ahkemearri rievtti mielde lea 18 jagi.
– Moai letne hállan guhká jo ahte go son deavdá 17 jagi, de áigo searvat ovttas gilvvuide, muitala áhččeolmmoš.
Gergosat duolmmastit
Stein Joks muitala gánddas sihkkelasttán dan rájes go lei 13 jahkásaš ja birgen bures juniorgilvvuin.
Dasa lassin leaba sihke áhčči ja gánda viššalis čuoigit.
– Son ii leat álggahalli ja son lea buoret sihkkelasti oanehis mátkkis go mun. Son lea buorre sihkkelasti, muhto dál lea dieđus gilvu, mii bistá badjel jándora, de fertet oaidnit mo son dan hálddaša, muitala Joks.
Hárjánan gilvaleaddji
Stein Joks ieš lea searvan golbmii ovdal ja vuittiige Offroad 300 luohká 2012:s, ovttas Per Torleiv Ravnan.
Oktii bođii nubbin ja oktii šattai gaskkalduhttit.
– Munno ambišuvnnat leat dán háve čađahit gilvvu ja oažžut buori vásáhusa. Moai finaime sihkkelastimin gilvomađiija gieskat ja sáhttán lohkat ahte moai ledne gergosat duolmmastit gilvui ja illudetne issorasat, deattuha son.
Nieida maid mielde
Dasa lassin gilvala maiddái Joks nieida Martine Joks (19) seamma gilvvu nissonluohkás. Su sihkkelastinguoibmi lea Sirin Strand (19) ja joavkku namma lea Team Sirma Queens.
– Mii leat veahá erenomáš bearaš valáštallama dáfus. Mu nieida searvá maiddái gilvvuide. Lea dušše eamit ja beana, geat eaba searvva, reaškkiha son.
Boađus ii leat deháleamos
– Dát sihkkelgilvu lea gohčoduvvon vásáhusgilvun, ja dalle ii lea buođus dat deháleamos, muhto čađahit dan joavkkus. Ja dat ahte beasan iežan gánddain duolbmat, lea issoras erenomáš, dovddasta son.
Stein Joks namuha maiddái ahte Sirma IL valáštallansearvi lea okta dain geat servet «buhtes» servviin gilvvuide.
– Mii eat viečča gilvaleddjiid eará servviin, muhto geavahit iežamet sihkkelastiid, rámida son.
