Offroad Finnmark gilvvuid jođiheaddji Jørund Greibrokk muitala dán jagáš gilvomađiija leat hástaleaddjin garra arvviid geažil ja lea losit go maid ledje vuordán.
Lávvardaga gaskabeaivvi áigge ledje almmolaš rahpandoalut Offroad Finnmark-sihkkelgilvvuin Álttá guovddážis.
Ávvir boahtá čuovvut sámi oassálastiid ja sámi guovlluid joavkkuid.
Offroad Finnmark-sihkkelgilvvut álge jo mannan lávvardaga, gos gilvaledje 150 kilomehtera luohkáin ja maiddái mánáidgilvvuin.
Odne lei vuolgga 700-kilomehtera nisson ja seaguhuvvon joavkkuid luohkáin gaskabeaivvi áigge ja diibmu 18:00 duolmmastit almmáiolbmot guhkes ja hástaleaddji mátkkái.
Stánžžas ja lossat
Duorastaga duolmmastit 300-kilomehtera luohkáin. Gilvvuid jođiheaddji muitala gilvomađiija lea stánžžas ja lossat.
Dán jagi oassálastet 25 joavkku 700-kilomehtera gilvui, mas dušše leat oassálastit golmma iešguđet luohkkás ja 100 joavkku 300-kilomehtera gilvui iešguđet luohkáin.
– Mađiija lea hui stánžžas ja šaddá losit go maid leimmet vuordán ja ballan. Dálki galgá goittot buorránit duorastaga rájes, muhto leat 700-kilomehtera oassálastit geat šaddet veahá rahčat, dovddasta Greibrokk.
Ii leat fuolas
Son goittot ii leat fuolas 700-kilomehtera oassálastiin, go lohká sin bures diehtit makkár gilvui leat searvamin ja mii vurdojuvvo valáštalliin.
Vearrát lohká leamaš 300 kilomehtera oasálasttiin, geat leavttuin geahččalit duolbmat.
– Vuosttaš beaivvit bohtet leat lossadat, muhto sávvamis dálkedieđáhus doallá deaivása, ahte galgá firtet gaskavahkku ija rájes ja goikada mađiija, sávvá son.
Diibmá seammaláhkai
Jørund Greibrokk dadjá diibmá leamaš justa seamma láhkai dálkki dáfus, čoaskkis ja arvi vuosttaš beivviid, muhto firtii gilvvuid loahpas.
– 700-kilomehtera sihkkelastit leat bures ráhkkanan ja sis leat gálvvut mielde mat leat bákkolaččat, earet eará albma bivut, čilge son.
