Sámediggeráđđi lea ovdalaš geasseluomu juolludan giellaprošeavttaide doarjagiid measta 2,9 miljovnna ruvnnu ovddas. Dán háve de ledje ohcamat badjel 4,3 miljovnna ruvnnu ovddas.
Sámediggeráđđi vuoruhii NMK Hålogaland mohtorsearvvi giellaprošeavtta nannet ja geavahišgoahtit sámegiela mohtorvaláštallamis. NMK Hålogaland mohtorsearvi, Evenášši suohkanis, čállet ohcamis ahte sis leat máŋga sápmelačča miellahttun ja danne háliidit nannet sihke kultuvrra ja giela mohtorsearvvis. Sámediggeráđđi juolludii 40 000 ruvnnu dán giellaprošektii, čállet sii preassadieđáhusas.
Sámediggeráđi Mikkel Eskil Mikkelsena (NSR) mielas lea buorre go mohtorvaláštallamis vuoruhit sámegiela sihke hárjehallamis, gilvvus ja sosiála gávnnademiin.
– Go mohtorsearvvis háliidit viššaleappot geavahišgoahtit sámegiela, de dát lea buorre valáštallanođas. Mohtorsearvi áigu gilvvohallamiin čállit sihke prográmmaid ja bovdehusaid sámegillii ja áigot maid levget sámeleavggain. Sámemusihkka galgá čuojahuvvot gilvvuin ja sámi musihkkárat galget guoimmuhit ja dát lea buorre ođas, dadjá Mikkelsen.
Sámediggeráđđi cealká mearrádusas ahte daid suohkaniin gos sámegiella lea rašis dilis, de lea dehálaš sihke nannet ja doalahit giellamovtta ja áŋggirdeami.
– Áibbas dárbbašlaš oahpporeaidu
Sámediggeráđđi lea duhtavaš go nu ollugat ohcet gielladoarjagiid ja su mielas lea buorre go NA Technologies Oslos lea ohcan ráhkadit applikašuvnna New Amigos bihtánsámegillii. Sámediggeráđđi juolludii 300 000 ruvnno prošektii. Dá lea ovttasbargu Duoddara Ráfe ja Stormen sáme guovdátjav gaskka.
– Dainna applikašuvnnain lea vejolaš oahppat bihtánsámegiela. Dál eai gávdno fávdnádit giellaoahppanreaiddut bihtánsámegillii ja lea áibbas dárbbašlaš ahte gávdnojit oahpporeaiddut jus dán giela galgá nagodit ealáskahttit, dadjá Mikkelsen.
Sámediggeráđđi maid juolludii doarjagiid dáidda giellaprošeavttaide:
• Dittdesign.no geat áigot ráhkadit applikašuvnna mánáide ja man namma lea «Mánná gii manahii iežas giela«, doarjja 300 000 ru.
• Sijti Jarnge, Aarborten tjïelte – Saemien giele-areenah Tjaalehraajroeh, teakstačállinmovttiidahttinprošeakta, doarjja 300 000 ru.
• Skinny Bandit AS, Oslo, Jorgalit appa «Veien hjem – ruoktot mátki» dárogielas sámegillii, doarjja 300 000 ru.
• Kirsti Suongir, Deatnu, ráhkadit appa mas hutká vuogi mo sámegiel gramatihka sáhttá oahpahit dárogielagiidda, doarjja 270 000 ru.
• Røros tjïelte, Saemien giela-areenah Skuvlen mænngan jïh gïeletjiehpie, doarjja 200 000 ru.
• Stall Eivik, Hábmera suohkan, giellagurssat julevsámegillii mánáide ja nuoraide, doarjja 150 000 ru
• Málatvuomi suohkan, Sámegiel kurssat ,doarjja 150 000 ru.
• Bárus AS, Guovdageaidnu, Guovdageainnu eanu ja eatnogátti namat, čohkket báikenamaid, doarjja 130 000 ru.
• Álttá nuoraidskuvla, nannet sámegiela árvvu Álttá nuoraidskuvllas 76 100 ru.
• Heatta consulting, Guovdageainnu sohkagirji 40 000 ru.
• Sárgu AS, Deatnu, ráhkadit 30 gifs sámegillii, geavahit dáid sosiála mediain, doarjja 40 000 ru.
• Guovdageainnu historjásearvi, Nuohttundoahpagat 40 000 ru
• Davvi Girji, Kárášjohka, Johkafanas plakáhtta 40 000 ru.
• Audioland Áltá, Stoahkat luđiin 40 000 ru.
• Márkomeannu searvi, Mánáid musihkkariemut Bådåddjos 40 000 ru
• Mjøsan dajve saemien siebrie, Lom, oahppat ja oččodit giela ja sámegielsániid, giellaoahpaheaddji veahkkái dárbu, doarjja 25 000 ru.
