– Mii leat gergosat dalán nammadit lahtuid boazodoallostivrii go de oažžut čielga signála das ahte ovddiduvvo evttohus boazodoallolága rievdadeamis, das mii guoská boazodoallostivrra doibmii ja čoahkkádussii, dadjá sámediggeráđđi Silje Karine Muotka.
Sámediggi lea válljen ahte ii nammat lahtuid boazodoallostivrii 2018:s, go Sámediggi vuordá ahte lávdegoddái galgá sáhttit válljejuvvot jođiheaddji Sámedikki nammadan lahtuid gaskkas.
Dasto galget Sámedikki lahtut stivrras oažžut vejolašvuođa čuovvut ja ovddidit oainnuid mat sin mielas leat riekta iežaset gelbbolašvuođa ja jáhku mielde, dieđiha Norgga Sámediggi preassadieđáhusas.
Čoahkkin stáhtaráđiin
Sámediggeráđis Silje Karine Muotka lea leamaš čoahkkin stáhtaráđiin Bård Hoksrud ovddit vahkus gos son válddii ovdan problematihka boazodoallostivrrain.
– Mun lean čielgasit dadjan stáhtaráđđái ahte Sámediggi áigu vuoruhit dán nammadeami dalle go duođaštuvvo ahte departemeantta ja Sámedikki gaskka lea sohppojuvvon ahte ovddiduvvo láhkarievdadanevttohus dán čuoggá ektui boazodoallolágas, dadjá Muotka.
Boazodoallostivra lea deaŧalaš oassi sámi iešmearrideamis, muhto Sámediggi vásiha ahte dat ii doaimma álbmotrievtti ektui.
Eanan- ja biebmodepartemeanta sáhttá iskkadit ja hilgut boazodoallostivrra mearrádusaid, ja stivret movt boazodoallostivra galgá dahkat mearrádusaid dihto áššiin.
Dán sáhttet dahkat almmá ahte Sámediggái dahje ealáhussii dieđihuvvo dahje konsulterejuvvo dan birra.
– Fertejit ovddidit láhkarievdadanevttohusa
– Dás ii leat eará čoavddus go ovddidit láhkarievdadanevttohusa dán čuoggás, dadjá Muotka Sámedikki preassadieđáhusas.
Son deattuha ahte boazodoallostivra lea maŋimuš oktasaš orgána stáhta ja Sámedikki gaskka boazodoalloáššiin, ja ahte dárbbašuvvo buresdoaibmi boazodoallostivra mii doahttaluvvo ja man oktavuođas nammaduvvon lahtuin lea duohta vejolašvuohta váikkuhit, maiddái Sámedikki beales.
Vuordá positiiva duođaštusa
– Mun oaivvildan ahte stáhtaráđđi hehttehusa haga iežas bealis sáhttá deaivvadit Sámedikkiin dán áššis. Dát lea midjiide deaŧalaš ášši, ja jos mii galgat sihkkarastit legitimitehta ja guorraseami váttis mearrádusaid oktavuođas, de lea erenoamáš deaŧalaš ahte dás šaddá dássedeaddu, lohká Muotka.
Muotka doaivu ja sávvá ahte stáhtaráđđi attašii positiiva duođaštusa das ahte dát proseassa galgá álggahuvvot nu johtilit go lea vejolaš, vai Sámediggi beassá nammadit lahtuid boazodoallostivrii vuorddedettiin lága muddema.
– Stáhtaráđđi oaččui mu gulahallankoartta, de son diehtá mainna lágiin son oažžu oktavuođa muinna, dadjá Muotka loahpas preassadieđáhusas.
